Солонгосоос нутаг буцах бол өршөөлийн сард хамрагдаарай

Хэрэв та Солонгост хууль бусаар оршин сууж байгаад нутаг буцахаар шийдсэн бол өршөөлийн сард багтан буцаарай.

 

БНСУ-н Хууль зүйн яамнаас 2025 оны 12-р сарын 1-нээс 2026 оны 2-р сарын 28-ныг дуустал өршөөлийн сар болгон зарласан байна. Энэ хугацаанд хууль бусаар оршин сууж буй иргэд өөрийн хүсэлтээр нутаг буцсан тохиолдолд торгууль ногдуулахгүй, хэсэг хугацааны дараа эргэн БНСУ-д орж ирэх хилийн хориг тавьдаггүй байна.

 

Өршөөлийн сараар буцахаар шийдсэн иргэд Гадаад паспорт, Өршөөлийн сараар буцаж буй өргөдөл, Буцах онгоцны билетээ авч цагаачлалын (иммэгрейшн) газар биеэр очих эсвэл www.hikorea.go.kr цахим хаягаар нэвтрэн орж онлайнаар хүсэлтээ өгөх боломжтой. Буцахаасаа хамгийн багадаа 3 хоногийн өмнө хүсэлтээ өгсөн байх шаардлагатай.

 

Жич: Өршөөлийн сард хамрагдах боломжгүй иргэд

-Хууль бусаар хил нэвтэрсэн

-Хуурамч паспорт ашиглан хил нэвтэрсэн

-Эрүүгийн гэмт хэрэгт холбогдсон

-Албадан нутаг буцаах шийдвэрээ биелүүлээгүй

-2025.12.01-ний өдрөөс хойш хууль бус болсон иргэд хамрагдах боломжгүй юм байна.

 

Дэлгэрэнгүй мэдээллийг БНСУ-ын Цагаачлалын албаны 1345 дугаарт залган #7 гэсэн товчийг дарж монгол хэлээрээ аваарай.