Алдагдалтай, хулгайтай МИАТ-ийн захирал Б.Мөнхтамираас эхлээд цэвэрлэнэ

Гүйцэтгэх засаглалын тэргүүн Г.Занданшатар “Хулгайтай тэмцэнэ” хэмээн томилогдож байсан цагаас хойш хүлээлт үүсгэсэн ч үгүй. Хамгийн ихээр хулгай үүрлэсэн Төрийн өмчит компаниудын удирдлагуудтай хариуцлага тооцож эхлэв. Үүний нэг илрэл нь МИАТ-ийн Гүйцэтгэх захирал Б.Мөнхтамир өөрийгөө өмгөөлүүлж, магтуулсан мэдээ мэдээлэл, мессежийг цахим ертөнцөд давалгаалуулж эхэлсэн. Мэдээллээс харахад хэтэвч нэг, Төрд шахааны өгөө аваатай нөхдүүд нь дэмжиж байгаа нь илт анзаарагдана.

 

Учир нь нэгэнт “Хулгайтай тэмцэнэ” хэмээн гарч ирсэн Ерөнхий сайд хамгийн их хулгайтай газраар нэрлэгдээд удаж буй МИАТ-ийн Гүйцэтгэх захирал Б.Мөнхтамираас эхлээд цэвэрлэх гэж байгааг дуулгалаа. Тиймээс Засгийн газрын хуралдаанаас алдагдалтай ажилласан МИАТ компанийн захирал Б.Мөнхтамир, Дулааны дөрөвдүгээр цахилгаан станц компанийн захирал Ү.Төмөрхуяг, Мэдээлэл холбооны сүлжээ компанийн захирал Б.Мөнхбат нарт хариуцлага тооцон ажлаас халах шийдвэрийг Төлөөлөн удирдах зөвлөлд нь чиглэл болгожээ. Иймээс МИАТ компанийн Гүйцэтгэх захирал яаран сандран цахим орчинд өөрийгөө магтуулах гээд улам бүр “гэрэл цохиулчих”-лаа. Хариуцлага алдсан бол хэчнээн гэрэл гэгээ байгаад нэмэргүй л дээ.

 

Уг нь МИАТ компани чамгүй ашигтай ажилладаг ч энэ оны хувьд гэнэт алдагдал өссөн нь тооцоо судалгаагүй цалин нэмэгдүүлсэнтэй холбоотой гэж үзэж байна. Баримтаас харахад хулгай дээрэм хэтэрсэн нь ч алдагдал хүлээхэд чамгүй нөлөөлөө биз. Тус компани нь энэ оны эхний есөн сарын байдлаар алдагдал нь зургаан тэрбум төгрөг давсан бол оны эцэст арван тэрбумд хүрч болзошгүй болсныг албаныхан дуулгасан юм.

 

Гэхдээ Төрийн өмчит компаниуд дундаа чамгүй хөрөнгөлөг МИАТ-д эртнээсээ улстөрчдийн тавиулууд очиж, хулгай хийдэг газрын нэг байсныг нуух хэрэггүй. Харин Б.Мөнхтамир захирлын хувьд маш сайн үргэлжлэл байж чадсан нь дараах баримтуудаас харагдана. Тиймээс түмэн олны хувьд ч Ерөнхий сайд Г.Занданшатар “Хулгайтай тэмцэх”-дээ бүр дээрээс нь эхлэхээр шийдсэн нь цаашид энэ ажиллагаа улам бүр идэвхжин, төрд үүрлэсэн хулгай дээрэм бага ч атугай илааршиж, томоохон сануулга болох юм байна гэсэн итгэл найдвар төрж байгаа аж. Б.Мөнхтамирын хувьд МИАТ хэмээх их айлыг 2021 оноос удирдах болсон цагаас хойш түмний чихийг чамгүй халууцуулаад авсан нөхөр.

 

Олон зүйл нуршаад яахав. Хамгийн ноцтой нь 2023 онд МИАТ компани хоёр ширхэг “Боинг 787 900” онгоцыг түрээсээр авсан ч хөдөлгүүр нь эрсдэлтэй байжээ. Гагцхүү үүнийг Б.Мөнхтамир нар мэдэж байсан төдийгүй олон улсад анхааруулгатай байж. Өөрөөр хэлбэл МИАТ-ийн инженер техникийн ажилтнууд үзлэг шалгалт хийн, хоёр онгоцны хөдөлгүүр эрсдэлтэй гэдгийг дуулгасан ч захирлууд нь түрээсийн гэрээг хийж шууд тээвэрт явуулсан байна. Тиймээс онгоцнуудын хөдөлгүүр 2024 оны сүүлээр ашиглах боломжгүй болж зогсолт хийсэн ч үүнийг нууцалсан. Улмаар онгоцнууд 2025 онд хагас жил орчим зогсож, хөдөлгүүрийг солих зардал, мөн онгоц зогссон хугацааны түрээс болон олох ёстой ашиг зэрэг олон тэрбум төгрөгийн алдагдлыг МИАТ компани хүлээсэн ч худал мэдээлэл өгч нууцалсаар өнөөдөрт хүргэжээ. Үүнийг Зам тээвэр, хөгжлийн яамны Автотээврийн бодлогын хэрэгжилтийн газар, Хяналт шинжилгээ, үнэлгээний газраас тус тусын чиглэлээр шалгаад эрсдэлтэй гэсэн дүгнэлтэд хүрсэн ч аль нэг шатандаа дарагдаж үгүй болсон гэдгийг эх сурвалж хэлж байна. Энэ бол эвлэрч болохгүй ноцтой асуудал төдийгүй хариуцлага хүлээлгэх ёстой гэмт хэрэг. 

 

Дээрх ноцтой мэдээллээс гадна Иргэний нисэхийн үндэсний төвд ажилладаггүй байж хий цалин авдаг 30 гаруй хүн байгаа төдийгүй Б.Мөнхтамир захирал мэргэжлийн бус удирдлагын баг бүрдүүлэн, цалинг нь 10 гаруй сая төгрөгөөр тогтоож, чөлөөлөхдөө тэтгэмж олгуулжээ. Мөн нисэхийн аюулгүйн техник үйлчилгээ үзүүлэх зориулалтын гурван ширхэг цоо шинэ автомашиныг жолоочийн хамт авсан ч хаана үйлчилгээнд явуулдаг нь тодорхойгүй гэнэ. Лавтай МИАТ компани ашигладаггүй гэдгийг хэлж байна.

 

Б.Мөнхтамир захирал мөнгө гаргаж л байвал хууль хамаагүй ажилладаг нь юу юунаас харагдана. Тэрбээр Төрийн хэмнэлтийн хуулийг зөрчиж, 2022 оны зургаа болон долоодугаар сард Нэйшнл Ньюс Корпорэйшн компаниар зар сурталчилгаа хийлгэж, хоёр удаагийн гүйлгээгээр нийт 100,046,542 төгрөгийг тус компанид шилжүүлжээ.

 

Ямартай ч Ерөнхий сайд Г.Занданшатарын чиглэлийн дагуу танхимынх нь сайд нар төдийгүй гишүүд ч ашиггүй ажиллахын зэрэгцээ хулгай нүүрлэсэн Төрийн өмчит компаниудын захирлуудыг шүүмжлэх, улмаар хариуцлага тооцоход дуу хоолойгоо нэгтгэх болсон. Тухайлбал, Засгийн газрын Хэрэг эрхлэх газрын дарга С.Бямбацогт “Төрийн өмчит компанийг ашиггүй ажиллуулж байгаа захирлуудыг толгой дараалан чөлөөлнө.  Алдагдалтай ажиллаж байхад цалин, үр дүнгийн урамшуулал авдаг байдлыг таслан зогсооно” гэж мэдэгдсэн бол УИХ-ын гишүүн О.Амгаланбаатар “Төрийн өмчит компанийг алдагдалтай ажиллуулж хулгай хийж байна” хэмээн нэр цохон шүүмжилнэ лээ. Ямартай ч Гүйцэтгэх засаглалын тэргүүний “Хулгайтай тэмцэх”-ээр эрс шийдсэн нь танхимын сайд нар төдийгүй УИХ-ын гишүүдийн ч дэмжлэгийг авах болжээ.

 

Их Мэдэгч