Аббас Арагчи: Жагсаалын ард АНУ, Израйлын засгийн газрууд байгаа

Ираны Гадаад хэргийн сайд Аббас Арагчи  Fox News-т өгсөн ярилцлагадаа Иран жагсагчдыг дүүжлэх "төлөвлөгөөгүй" бөгөөд "дүүжлэх нь хэлэлцэх асуудал биш" гэж мэдэгджээ.

Норвегид төвтэй Ираны Хүний Эрхийн ( IHR ) мэдээлснээр, Ираны шоронд дүүжлэх нь түгээмэл байдаг аж.

АНУ-ын Ерөнхийлөгч Дональд Трамп өмнөх өдөр нь хэрэв Иран жагсагчдыг дүүжлэвэл "бид маш хатуу арга хэмжээ авах болно" гэж мэдэгдсэн. 

Өнгөрсөн сарын 28-наас хойш Иранд засгийн газрын эсрэг жагсаалууд үргэлжилж байна. Эхэндээ эдийн засгийн сэтгэл дундуур байдалд төвлөрсөн байсан ч аажмаар засгийн газрын эсрэг улс орон даяар эсэргүүцлийн жагсаал болж өргөжсөн. Ерөнхий тооцооллоор мянга мянган хүн нас барсан бөгөөд Ираны дэглэмийн эсрэг хэвлэл мэдээллийн хэрэгслүүдээс 12,000 орчим хүн нас барсан гэсэн баталгаагүй мэдэгдлүүд гарсан байна.

АНУ-д төвтэй Хүний эрхийн идэвхтнүүд ба шинжээчид ( HRANA ) байгууллага 2,403 жагсагч, 147 засгийн газрын албан тушаалтны үхлийг баталсан. Мөн 18,137 хүнийг баривчилсан гэж мэдээлсэн.

Ираны засгийн газар эдийн засгийн бэрхшээлээ гадаадын хориг арга хэмжээнээс үүдэлтэй гэж үзэж байгаа бөгөөд жагсаалын ард АНУ, Израилийн засгийн газрууд байгаа гэж мэдэгджээ.