Дональд Трампын аминд халдахыг завдсан этгээдэд бүх насаар нь хорих ял оноожээ

АНУ-ын Флорида мужийн Вест Палм Бич хот дахь Трампын нэрэмжит олон улсын гольфын клубт 2024 оны есдүгээр сард Ерөнхийлөгч Дональд Трампын аминд халдахыг завдсан хэрэгт буруутгагдсан Райан Рут бүх насаар нь хорих ял оноожээ.
59 настай Райан Рут тухайн үед Ерөнхийлөгчийн сонгуульд нэр дэвшиж байсан Дональд Трампыг хөнөөхөөр төлөвлөж, гольфын талбайн ойролцоо нуугдан байрласан нь мөрдөн шалгалтаар тогтоогдсон байна. АНУ-ын Нууц албаны ажилтан бутнаас цухуйж буй винтовын голыг анзаарч, Рут руу буудсаны дараа тэрбээр хэргийн газраас зугтсан ч ойролцоох бүсэд баривчлагджээ.
Шүүгч Айлин Каннон ялын тогтоолдоо Рутын үйлдлийг “маргаангүйгээр бүх насаар нь хорих ял оноох үндэслэлтэй” хэмээн дүгнэсэн байна. Тэрбээр “Рут хэдэн сарын турш ерөнхийлөгчийн сонгуульд нэр дэвшигчийг хөнөөх бэлтгэл хийсэн бөгөөд замд нь таарсан хэнийг ч алах хүсэлтэй байснаа харуулсан. Мөн үйлдэлдээ огт гэмшээгүй” гэж тэмдэглэжээ.
Холбооны мөрдөн шалгах байгууллагын мэдээлснээр Рутын нуугдаж байсан газраас дурантай хагас автомат винтов, сунасан магазин олдсон бөгөөд Трамп гарч ирж болзошгүй байршлуудын жагсаалт, мөн найздаа үлдээсэн тэмдэглэл илэрсэн байна. Уг тэмдэглэлд “аллага үйлдэх оролдлого” гэж тодорхойлжээ.
Шүүх хурлын явцад Рут өөрийгөө өмгөөлөхөөр сонгогдож, олон удаа эмх замбараагүй авир гарган, шүүгчийн сануулгыг үл тоомсорлосон байна. Түүнийг гэм буруутай гэж үзсэний дараа Рут үзгээр өөртөө гэмтэл учруулахыг оролдсон ч АНУ-ын маршалууд түүнийг шүүхийн танхимаас яаралтай гаргажээ.
Рутын өмгөөлөгч Мартин Росс уг хэргийг давж заалдах болно гэдгээ мэдэгдсэн бөгөөд Рут өөрийгөө гэм буруугүй гэж үзэж байгаагаа илэрхийлсээр байна.
Ташрамд, энэхүү хэрэг нь 2024 онд Дональд Трампын аминд халдах хоёр дахь оролдлого болж байгаа юм. Үүнээс өмнө долдугаар сард Пенсильвани мужийн Батлер хотод болсон сонгуулийн компанит ажлын үеэр буудлага гарч, нэг хүн амиа алдаж, хэд хэдэн хүн шархадсан бөгөөд Трамп ч мөн гэмтэл авсан юм. Тус хэрэгт буруутгагдсан 20 настай Томас Круксийг хэргийн газарт цагдаа нар буудан хороосон билээ.