ТУЗ-ийн дарга бүх ажилтнууддаа 93 тэрбум төгрөгийн урамшуулал олгожээ

Хятадын нэгэн компани ажилчдадаа жилийн ашгийнхаа 70% хүртэлх их хэмжээний урамшуулал олгосноороо олны анхаарлыг татааад байна.

Өмнөд Хятадын өглөөний пост (SCMP)-д мэдээлснээр, Хэнань мужийн кран үйлдвэрлэгч Хенан Майнинг Машинер компани саяхан нэгэн арга хэмжээний үеэр ажилчдадаа жилийн эцсийн урамшуулал болгон нийт 180 сая юань (ойролцоогоор 93 тэрбум төгрөг) тараасан байна. Арга хэмжээний хамгийн онцлох үйл явдал нь "бэлэн мөнгө цуглуулах" явдал байсан байна.

Арга хэмжээг зохион байгуулж буй газрын 800 гаруй хүлээн авалтын ширээн дээр бэлэн мөнгө овоолсон байсан бөгөөд 7000 орчим ажилтны өмнө 60 сая гаруй юань (ойролцоогоор 31.2 тэрбум төгрөг)-ийг газар дээр нь тараасан байна.
Мөн ажилчид тодорхой хугацаанд бэлэн мөнгөө биечлэн тоолж, тэр хэмжээний мөнгөө гэртээ авч явсан өвөрмөц арга хэмжээ зохион байгуулагдсан байна. 

2002 оны 9-р сард байгуулагдсан тус компани нь кран болон материал боловсруулах бүтээгдэхүүний үйлдвэрлэгч, үйлчилгээ үзүүлэгч бөгөөд дэлхийн 130 гаруй оронд үйл ажиллагаа явуулдаг гэдгээрээ алдартай аж.

Тус компанийн өнгөрсөн жилийн цэвэр ашиг ойролцоогоор 270 сая юань (ойролцоогоор 140.5 тэрбум төгрөг) байсан гэж мэдээлжээ. Тус компани үүний 180 сая юань буюу ойролцоогоор 67%-ийг ажилчидтайгаа хуваалцсан байна.

Тус компанийн эзэн гэгддэг ТУЗ-ийн дарга Куй Фэйжун нь 98.88%-ийн хувьцаа эзэмшдэг бөгөөд ажилчдад ногдол ашгаа өгсөн гэж ярьжээ.

ТУЗ-ийн дарга гэр ахуйн цахилгаан хэрэгсэл болон бусад шагнал тараах гэж байсан санхүүгийн багт "Та нар яагаад угаалгын машин гэх зэрэг цахилгаан бараа өгч байгаа юм бэ? Алтны үнэ өссөн тул тэдэнд бэлэн мөнгө өг" гэж зааварласан байна. 

Тэрбээр мөн ажилтан бүрт 20,000 юань (ойролцоогоор 10 сая төгрөг) нэмж өгөх шийдвэрийг гаргажээ.

Энэ мэдээ олон нийтэд гарахад ТУЗ-ийн даргыг "хамгийн их мөнгө өгөх дуртай дарга" гэж хочилсон ч орон нутгийн хэвлэл мэдээллийн хэрэгслээр өгсөн ярилцлагадаа тэрбээр “Өнөө үед залуучууд машины зээл, орон сууцны ипотекийн зээлтэй тэмцэж байгааг би маш сайн мэдэж байна” гэж хэлсэн бөгөөд “Компанийн өгч буй багахан тусламж тэдэнд маш их урам болно гэж найдаж байна” гэжээ.

Тус компани мөн 2024 онд ашгийнхаа нэлээд хэсгийг гүйцэтгэлд суурилсан урамшуулал болгон ашигласан бөгөөд өнгөрсөн жилийн Олон улсын эмэгтэйчүүдийн баяраар 2000 эмэгтэй ажилтанд нийт 1.6 сая юань (ойролцоогоор 750 сая төгрөг) урамшуулал олгожээ.

Энэ мэдээг сонссон интернет хэрэглэгчид “Дарга Куй бол үнэхээр Хятадын баялгийн бурхан”, “Сурталчилгаа биш энэ урамшуулал нь зар сурталчилгаанаас хамаагүй илүү үр дүнтэй”, “Би ийм компанийн төлөө үхмээр байна”, “Би ч бас тэр компанид ажиллахыг хүсч байна” гэх зэрэг урам зоригтой сэтгэгдэлүүд үлдээжээ.