Иранд ОХУ мэдээлэл дамжуулсныг үгүйсгэсэнгүй

Ираны Гадаад хэргийн сайд Аббас Арагчи Орос улстай цэргийн хамтын ажиллагаагаа хүлээн зөвшөөрч, Иран дайныг бүрэн зогсоох хүртэл тэмцэнэ, түр гал зогсооход сэтгэл хангалуун бус байх болно гэж мэдэгдэв.

NBC телевизэд өгсөн ярилцлагадаа "Иран, Оросын хоорондох цэргийн хамтын ажиллагаа шинэ зүйл биш, нууц биш. Энэ нь өнгөрсөн хугацаанд байсан бөгөөд ирээдүйд ч үргэлжлэх болно" гэжээ.

Орос улс Ойрхи Дорнодод байрлуулсан АНУ-ын цэргийн бааз болон АНУ-ын Тэнгисийн цэргийн хөлөг онгоцнуудын байршлын талаар мэдээлэл өгч байгаа гэсэн мэдээллийг үгүйсгээгүй ч тодорхой мэдээлэл өгөхөөс зайлсхийв. Тэрээр "Орос бидэнд олон талаар тусалж байгаа ч бидэнд дэлгэрэнгүй мэдээлэл алга" гэв.

АНУ-ын Ерөнхийлөгч Дональд Трампын Ираны арми маш суларсан тул хуурай замын цэргийн хүчин оруулах тухай мэдэгдлийн талаар сайд Арагчи "Ядаж л одоохондоо биш. Одоогоор бид хуурай замын тулаан хийх бүрэн чадвартай" гэж мэдэгдэв. Тэрбээр "Манай нутаг дэвсгэрт нэвтэрсэн аливаа дайсагнасан үйлдэлд хариу өгч, устгахад бэлэн" гэжээ.

Ираны дайралт нь зөвхөн Израильд төдийгүй хөрш орнуудад хохирол учруулж байна гэсэн мэдэгдлийн талаар Иран "Бид хөршүүд рүүгээ дайрахгүй байгаа ч харамсалтай нь бид тэдний нутаг дэвсгэр дээрх АНУ-ын цэргийн бааз, байгууламжуудад цохилт өгсөн" гэж онцолжээ.