"Энгийн хувцастай дөрвөн хүн зураг, бичлэг хийж, биднийг ажиглаж хоносон"

Өнгөрсөн шөнө Хэлмэгдэгсдийн хөшөөний дэргэд сэтгүүлч Н.Өнөрцэцэгийн ар гэрийнхэн хонолоо. Тэд Монголын шүүхийг үнэн, шударга, нээлттэй шүүгээсэй хэмээн хүсэж байгаа юм.

Н.Өнөрцэцэгийн эгч "Бид нар зүгээрээ, өлсгөлөн зарласан дүүдээ л санаа зовж байна. Өнөөдөр өмгөөлөгч нар нь Н.Өнөрцэцэгтэй уулзана. Уулзсаных нь дараа биеийн байдал нь ямар байгаа талаар мэдээлэл авна" гэв.

Н.Өнөрцэцэгийн дүү "Өнгөрсөн шөнө олуулаа л хонолоо. Энгийн хувцастай дөрвөн хүн зураг, бичлэг хийж, биднийг ажиглаж хоносон. Цагдаа нар бичиг баримтыг нь шалгаад толгой дохиод л явуулчхаж байна лээ. Нэг залууг бичлэг хийж байхад нь шалгааж байж утсыг нь харсан. Зөндөө зураг, бичлэг хийсэн байсан. Шүүх хурал маргааш 10 цагт эхэлнэ. Тэр хүртэл хариу иртэл нь сууна. Өндөр настай ээжийг маань арай дахиад хонуулчихгүй байлгүй гэж бодож байна" гэлээ.