Хон Ра Хи ойролцоогоор 3 их наяд воны үнэ бүхий Samsung Electronics компанийн хувьцааг заржээ

Солонгосын Лиум урлагийн музейн захирал Хон Ра Хи ойролцоогоор 3 их наяд воны үнэ бүхий Samsung Electronics компанийн хувьцааг зарж өв залгамжлалын татвараа төлсөн байна.

Өнөөдөр буюу 4 сарын 9-ний өдрийн санхүүгийн хөрөнгө оруулалтын салбарын мэдээлснээр, захирал Хон өнөө өглөө ажлын бус цагаар блок арилжаагаар Samsung Electronics компанийн 15 сая хувьцааг (0.25%-ийн хувьцаа) зарсан гэж мэдээлжээ. Блок арилжаа гэдэг нь их хэмжээний хувьцаа эзэмшдэг худалдагч зах зээл хаагдсаны дараа хувьцаагаа шилжүүлэхийн тулд худалдан авагчийг урьдчилан олж, зах зээлд нөлөөлөхгүй байхыг баталгаажуулдаг гүйлгээ юм.

Гэрээг 205,237 воны үнээр байгуулсан бөгөөд Samsung Electronics-ийн өмнөх өдрийн 210,500 воны хаалтын ханшид 2.5%-ийн хөнгөлөлт үзүүлсэн. Нийт дүн нь ойролцоогоор 3.08 их наяд вон юм. Энэхүү борлуулалтын дараа захирал Хонгийн Samsung Electronics дахь хувьцаа 1.49%-иас 1.24% болж буурсан байна.

Өмнө нь захирал Хон өнгөрсөн оны нэгдүгээр сард Шинхан банктай үнэт цаас (хувьцаа)-г худалдах итгэлцлийн гэрээ байгуулж байжээ.
Энэхүү хувьцааны борлуулалтыг Samsung-ийн үүсгэн байгуулагч талийгаач Ли Кун Хи таалал төгссөнөөс хойш хэсэгчлэн төлж ирсэн 12 их наяд воны өв залгамжлалын татварын эцсийн төлбөрийг төлөх алхам гэж тайлбарлаж байна.

Samsung-ийн гэр бүл 2021 оноос хойш таван жилийн хугацаанд өв залгамжлалын татварыг зургаан хэсэгчлэн төлж байгаа бөгөөд эцсийн төлбөрийг энэ сард дуусгахаар төлөвлөж байгаа аж.

Үүний зэрэгцээ, Samsung Electronics-ийн хувьцааны ханш өнөөдөр 204,000 вонд хүрч хаагдсан нь өмнөх өдрөөс 6,500 вон (3.09%) буурсан үзүүлэлт юм.