Ариана Гранде аялан тоглолтоо нулимстай үдэж, түр завсарлага авхаар болсноо мэдэгдлээ

Дуучин Ариана Гранде есдүгээр сарын 1-нд Лондонд болсон тоглолтоороо “Eternal Sunshine” аялан тоглолтоо өндөрлүүлж, цаашид хэсэг хугацаанд олны өмнө гарах үйл ажиллагаанаас завсарлахаар болсноо мэдэгдлээ. Түүний сүүлчийн тоглолт сэтгэл хөдөлгөм болж, Гранде үзэгчдэд талархлаа илэрхийлэх үеэрээ нулимс дуслуулах шахсан байна.

Тэрбээр тоглолтын үеэр “One Last Time” дуугаа дуулахдаа үзэгчдэд ойртон сөхөрч, хамтдаа дуулахыг хүссэн байна. Тус дуу нь 2017 онд Манчестер хотод болсон халдлагын дараа хохирогчид болон амьд үлдсэн хүмүүстэй холбоотойгоор онцгой утга агуулсан дуу болсон юм.

Тоглолтын төгсгөлд Гранде үзэгчдэд хандан “Энэ бол миний амьдралын хамгийн үзэсгэлэнтэй, гайхамшигтай туршлагуудын нэг байлаа. Би энэ бүхнийг үргэлж нандигнан санах болно” хэмээн талархлаа илэрхийлжээ. 

Түүний төлөөлөгчийн мэдээлснээр энэ шийдвэрт дуучны гадаад төрх, эрүүл мэндийн талаар олон нийт болон цахим орчинд удаан хугацаанд үргэлжилсэн хэт их анхаарал, шүүмжлэл нөлөөлсөн байна. 

Ялангуяа Грандегийн шинэ уран бүтээлийн дууны дүрс бичлэг гарсны дараа түүний жин, гадаад төрхтэй холбоотой олон нийтийн хэлэлцүүлэг эрчимжсэн аж. Үүний дараа дуучны төлөөлөгч “тасралтгүй үргэлжилж буй олон нийтийн хяналт, шүүмжлэл”-ээс үүдэн олны хараанаас хэсэг хугацаанд холдохоор болсныг мэдэгдсэн байна.

Гэсэн ч Гранде өөрийн шийдвэрийг сөрөг сэтгэгдэл, цахим шүүмжлэлд өгсөн гэнэтийн хариу биш гэдгийг онцолжээ. Тэрбээр энэ шийдвэрийг “эртнээс бодож төлөвлөсөн” бөгөөд өөрийн хүсэл, хэрэгцээгээ бодож гаргасан шийдвэр хэмээн тайлбарласан байна.

“Хил хязгаараа тогтоох хэрэгтэй. Хүн бүрт хааяа завсарлага авах шаардлага байдаг” хэмээн өмнөх тоглолтынхоо үеэр хэлжээ. 

Гранде мөн Лондонд ирэх зун тоглогдох “Sunday in the Park with George” жүжгийн гол дүрээс татгалзсан байна. Түүнтэй хамт “Wicked” кинонд тоглосон Жонатан Бэйли ч уг жүжгээс гарахаа мягмар гарагт мэдэгджээ.

“Eternal Sunshine” аялан тоглолт нь Грандег долоон жилийн дараа тайзнаа эргэн ирснийг тэмдэглэсэн бөгөөд нийт 41 тоглолт хийсэн байна. Лондонд болсон сүүлчийн тоглолтоороо тэрбээр аялан тоглолтоо өндөрлөж, одоогоор олны өмнө дахин хэзээ гарах нь тодорхойгүй үлджээ.

Гэхдээ Гранде уран бүтээлээсээ бүрэн холдож байгаа гэсэн үг биш. Тэрбээр жүжигчний уран бүтээлээ үргэлжлүүлэх сонирхолтой хэвээр байгаа бөгөөд энэ завсарлага нь өөрийнхөө амьдрал, эрүүл мэнд, хувийн орон зайд илүү анхаарах хугацаа болохыг илэрхийлсэн байна.