Непалын Нувакот мужид болсон томоохон үерийн үеэр эвдэрч сүйдээгүй ГАНЦ БАЙШИН

Непалд болсон их хэмжээний үерийн гамшгийн үеэр 1200 гаруй байшин сүйрч, олон мянган хүн нас барсан ч нуралгүй үлдсэн ганц байшин нь интернэт хэрэглэгчдийн анхаарлыг ихээхэн татаад байна.

Нью Йорк Таймс зэрэг гадаадын хэвлэл мэдээллийн хэрэгслүүд Пиакурелийн гэр бүлийн байшин саяхан Непалын Нувакот мужид болсон томоохон үерийн үеэр эвдэрч сүйдээгүй байгаа тухай мэдээлэв. Барилгын байршлыг Google газрын зураг дээр "Үерийн хамгаалалттай байшин" гэсэн нэрээр бүртгэсэн бөгөөд зочид зураг авахаар цугларсаар байна.

Үерийн хүчтэй урсгал барилга руу ороход Пиакурелийн гэр бүл гуравдугаар давхрын тагтан дээр хоргодож, аврагчдыг нэг цаг гаруй хүлээсэн байна. Тэдний тагтан дээрээс эмгэнэлт явдлыг харж байгаа зургууд олон нийтийн мэдээллийн хэрэгслээр дэлхий даяар тархаж, ус татсаны дараа аврах багийнхан шатаар аюулгүй гарч чадсан байна.

Нутгийн оршин суугч Бишмани Римал тухайн үеийн цөхрөнгөө барсан нөхцөл байдлыг дүрслэн хэлэхдээ "Ийм нөхцөлд амьд үлдэнэ гэдэгт хэн итгэх билээ?", "Амьд үлдэх магадлал 1% ч байхгүй гэж би бодсон" гэжээ.

Ус татсаны дараа байшинг шалгаж үзэхэд нэг, хоёрдугаар давхар нь ихэвчлэн эвдэрч, зөвхөн багана үлдсэн байсан ч барилга өөрөө нураагүй байв. Гуравдугаар давхрын тагтан дээрх угаалгын машин, овоолсон хувцас, дээвэр дээрх усны сав, нарны ус халаагч зэрэг нь бүрэн бүтэн хэвээр үлджээ.

Энэ байшин яагаад ширүүн усны урсгалд тэсвэртэй байсан талаар янз бүрийн дүн шинжилгээ гарч ирж байна.

Байшингийн эзэн Пиакурелл "Энэ байшинг анх 1995 онд нэг давхар барилга болгон барьсан бөгөөд дараа нь өргөтгөсөн" гэж хэлээд "Багануудын суурийг чулуулаг хөрсөнд гүн өрөмдөж, бэхэлсэн тул байшин тэсвэрлэж чадсан байж магадгүй" гэж нэмжээ. Барилгын бат бөх бүтэц, хийцлэл болон түүний оршин тогтнох түүхтэй холбоотой янз бүрийн санал бодол онлайн орчинд тархсаар байна.