Роналду Португалийн шигшээг орхилоо

Cristiano Ronaldo Португалын шигшээ багийн бэлтгэлийн баазыг орхисноо мэдэгдэж, пүрэв гарагт Данийн эсрэг хийх УЕФА-гийн Үндэстнүүдийн лигийн тоглолтод оролцох эсэх нь тодорхойгүй болоод байна.

Роналду лхагва гарагт өөрийн цахим хуудсаар дамжуулан шигшээ багийн бэлтгэлийн баазыг орхих шийдвэр гаргаснаа мэдэгджээ. Тэрбээр шийдвэрийнхээ шалтгааныг “цаг нь болохоор” тайлбарлана гэж мэдэгдсэн байна.

Энэхүү шийдвэр нь Португалын шигшээ багийн ахлах дасгалжуулагч Jorge Jesus Данийн эсрэг тоглолтыг Роналдугийн оролцоогүйгээр эхлүүлэхээр төлөвлөж байгаагаа хэвлэлийн бага хурлын үеэр хэлсний дараахан гарчээ.

41 настай Роналду нь эрэгтэйчүүдийн олон улсын хөлбөмбөгийн түүхэнд 146 гоолтойгоор бүх цаг үеийн хамгийн олон гоол оруулсан тоглогч хэвээр байгаа бөгөөд карьерынхаа 1000 дахь гоолд хүрэх зорилгоо үргэлжлүүлж байна.

Тэрбээр ням гарагт Норвегийн шигшээг 2:1-ээр хожсон тоглолтод оролцоогүй бөгөөд түүнээс хойш багийнхантайгаа хамт бэлтгэлд гараагүй байна. Үүнээс үүдэн Роналду болон дасгалжуулагч Жезус нарын хооронд үл ойлголцол үүссэн гэх мэдээлэл тархсан ч Жезус тэдний хооронд асуудал байхгүй гэж мэдэгдсэн байна.

“Би шийдвэр гаргадаг хүн. Үүнийг бүгд мэднэ. Дүрэм хүн бүрт адилхан үйлчилнэ” гэж Жезус хэлжээ.

Тэрбээр Норвегийн эсрэг тоглолтын үеэр Роналдуг удаан хугацаанд бие халаалгасан ч талбайд гаргаагүй нь алдаа байсан бөгөөд ийм нөхцөлд ямар ч тоглогч сэтгэл дундуур байх нь ойлгомжтой гэж тайлбарласан байна.

Португалын Хөлбөмбөгийн холбооноос Роналду бэлтгэлийн баазыг орхисныг баталгаажуулж, үлдсэн 24 тоглогчийн бүрэлдэхүүн багийн бэлтгэлээ үргэлжлүүлж байгааг мэдээлжээ.

Португалын шигшээ баг Үндэстнүүдийн лигийн А4 хэсгийг хоёр тоглолтын дараах зургаан оноотой тэргүүлж байгаа бол Дани болон Норвеги тус бүр гурван оноотой байна.

Роналдугийн бэлтгэлийн баазаас явсан нь зөвхөн энэ удаагийн олон улсын цонхыг хамрах эсэх, эсвэл цаашид үргэлжлэх эсэх нь одоогоор тодорхойгүй байна.