0

БНСУ-ын жүжигчин Ко Кён Пё согтуугаар тээврийн хэрэгсэл жолоодож, зам тээврийн осол гаргасан хэрэгт холбогдсоны улмаас телевизийн сувгууд түүний оролцсон нэвтрүүлгүүдийн дүрсийг хасах, багасгах шийдвэр гаргаж эхэлжээ.
Цагдаагийн мэдээлснээр тэрбээр арваннэгдүгээр сарын 14-ний өглөөний 03:30 цагийн орчимд Сөүл хотын Мапо дүүрэгт хог тээврийн автомашинтай мөргөлдсөн байна. Цагдаа нарыг хэргийн газарт очиход жүжигчин жолоочийн суудалд байсан бөгөөд согтууруулах ундааны зүйл хэрэглэсэн хэмжээ нь жолооны үнэмлэхийг нь хураах түвшинд хүрсэн байжээ.
Уг хэргийн дараа MBC телевизийн “Hang Out With Yoo” нэвтрүүлгийн уран бүтээлчид жүжигчний оролцсон хэсгүүдийг аль болох хасахаар болсон байна. Мөн tvN телевизийн “Sixth Sense: B-Side” нэвтрүүлгийн дараагийн дугаар болон финалын дугаарт түүний дүрсийг багасгахаар шийдвэрлэжээ.
Түүнчлэн “Amazing Saturday” нэвтрүүлэгт зочноор оролцсон бичлэгийг нь ч мөн багасгахаар төлөвлөж байгаа аж.
Харин арваннэгдүгээр сарын 29-нөөс цацагдахаар төлөвлөгдсөн “Bogum Magical” шоуны хоёрдугаар улиралд Ко Кён Пё гол гурван оролцогчийн нэгээр оролцож байгаа тул түүний бүх дүрсийг хасахад хүндрэлтэй байгаа бөгөөд продюсерууд эцсийн шийдвэрээ хараахан танилцуулаагүй байна.
БНСУ-д уран бүтээлчид хууль зөрчсөн, ёс зүйн асуудалд холбогдсон тохиолдолд телевизийн нэвтрүүлэг, киноноос тухайн хүний оролцоог хасах, багасгах явдал түгээмэл байдаг. Тухайлбал, “Signal 2” цувралын гол дүрийн жүжигчин Чо Жин Утай холбоотой дуулианы улмаас бүтээлийн нээлт хойшлогдож байсан юм.
Ийнхүү Ко Кён Пёгийн согтуугаар жолоо барьсан хэрэг түүний телевизийн уран бүтээлүүдэд оролцох байдалд нь нөлөөлж эхэллээ.
Хуваалцах:
Анхаар! Та сэтгэгдэл бичихдээ хууль зүйн болон ёс суртахууныг баримтална уу.
Одоогоор сэтгэгдэл бүртгэгдээгүй байна.