Ц.Нямбазар: Зүүн аймгууд руу тусламжийн цуваа бүхий ажлын хэсэг гарсан

Зүүн бүсийн аймгуудыг хамарсан том хэмжээний ой хээрийн түймэр гараад буй. Түймрийн голомтод ажиллах шуурхай ажиллагааны ажлын хэсэг байгуулагдсан талаар болон  түймрийн нөхцөл байдал, авч хэрэгжүүлж буй арга хэмжээ, тусламж хүргэхтэй холбогдуулан өнөөдөр (2025.03.11) ОБЕГ-аас мэдээлэл өглөө.

Өчигдрийн нөхцөл байдал дээр нэмээд 170 мян.га талбай нэмж галд өртсөн. мөн 38 гэр, 4 чингэлэг, 4 машин 2 мотоцикл, 48 хашаа саравч, 3706 бог 48 бод мал галт өртсөн байна. Түймрийн хохирлыг эцэслэн тогтоох боломжгүй байгаа тул хохирлыг тогтоох ажил үргэлжилж байгаа аж. 

Мөн өчигдөр Дундговь, Хэнтий аймгуудад хоёр гал түймрийн дуудлага нэмж ирсэн байна. Улмаар  УОК-ын даргын тушаалаар хохирлыг барагдуулах, тусламж үзүүлэх ажлын хэсэг байгуулж, ОБЕГ-ын тэргүүн дэд дарга бөгөөд штабын дарга, хурандаа Ц.Ганзоригоор ахлуулан зүүн аймгуудад ажиллахаар гарчээ. Ажлын хэсэгт ХХЕГ, ЦЕГ, ХХААХҮЯ, ОБЕГ, ЭМЯ, Мал эмнэлгийн ерөнхий газар зэрэг холбогдох албаныхан багтжээ. Түймэрт өртсөн иргэдэд эрүүл мэндийн болон сэтгэл зүйн тусламж үйлчилгээ, нийгмийн халамжийн үйлчилгээ, орон байраар хангах, гэр олгох ажлыг зохион байгуулах юм.