Баянгол дүүргийн хэмжээнд ТҮЦ нүүлгэн шилжүүлэх ажил эхэллээ

Нийслэлийн Засаг даргын 2025 оны А/237 захирамжийн хүрээнд дүүргийн хэмжээнд нийтийн эзэмшлийн зам талбайд байрлуулсан түргэн үйлчилгээний цэг /ТҮЦ/-үүдийг нүүлгэн шилжүүлэх ажлыг өчигдрөөс (2025.04.07) эхлүүлжээ.

Ингэхдээ эхний ээлжид удаан хугацаагаар ажиллаагүй, шинээр байршуулсан болон эзэн тодорхойгүй (үйл ажиллагаа явуулдаггүй) ТҮЦ-үүдийг нүүлгэж буй аж.

Тухайлбал,

-6-р хороо, "Жэм молл" худалдааны төвийн зүүн талд автобусны буудал дээр зөвшөөрөлгүй байршуулсан 1 ТҮЦ,

-13 дугаар хороо, Хасбаатарын гудамж, "Дархан нэхий" худалдааны төвийн ард зөвшөөрөлгүй байршуулсан 1 ТҮЦ,

-13-р хороо, Ард Аюушийн гудамж, "Хишиг" төвийн урд талд зөвшөөрөлгүй байршуулсан 1 ТҮЦ,

-15-р хороо, Байгаль эх цогцолбор талбайд зөвшөөрөлгүй байршуулсан 1 гээд нийт 4 ТҮЦ-ийг нүүлгэсэн байна. 

Дүүргийн хэмжээнд  өнөөдрийн байдлаар нийтийн эзэмшлийн зам талбайд зөвшөөрөлгүй байршуулсан нийт 289 ТҮЦ байгаагаас 44 ТҮЦ нь удаан хугацаагаар ажиллаагүй, шинээр байршуулсан болон эзэн тодорхойгүй байгаа юм.