Хэтрүүлэн идэх нь зүрхний шигдээс тусах эрсдэлийг нэмэгдүүлдэг гэдгийг салбарын мэргэжилтнүүд анхааруулдаг. Цусны даралт ихсэх, чихрийн шижин, гиперлипидеми зэрэг архаг өвчтэй хүмүүс хэт их идэх нь зүрхэнд ихээхэн ачаалал өгдөг тул болгоомжтой байх хэрэгтэй байдаг аж.
Филиппиний “Мукбанг YouTuber” 37 настай залуу хэт их идэж байгаа бичлэгээ нийтэлсний маргааш нь нас барсан бөгөөд үхлийн шалтгаан нь тодорхойгүй хэвээр байгаа ч эхний үзлэгээр зүрхний шигдээс болсон гэж одоогоор үзэж байгаа юм байна.
АНУ-ын зүрх судасны эмч, доктор Амея Кулкарни "Вашингтон Пост" сонинд хэлэхдээ "Залуу, эрүүл хүний хувьд хэт их идэх нь зүрхний шигдээс үүсгэх магадлал багатай. Гэсэн хэдий ч эрүүл мэндийн эрсдэлт хүчин зүйлтэй хүмүүсийн хувьд хэт их идэх нь зүрхийг стресст оруулж, цус харвалт үүсгэдэг" гэжээ.
Хэт их идэх, зүрхний шигдээс хоёрын хоорондын холбоог судалгаагаар нотолсон. 2000 оны Америкийн Зүрхний Ассоциацийн зохион байгуулсан хурал дээр танилцуулсан судалгаагаар зүрхний шигдээсний эрсдэл хэт их хоол идсэнээс хойш хоёр цагийн дотор дөрөв дахин нэмэгддэг болохыг тогтоожээ. 2005 онд хийсэн 17 судалгаанд хийсэн дүн шинжилгээ нь хүнд дасгал хөдөлгөөн, хэт их идэх, сэтгэл хөдлөлийн стресс зэрэг нь зүрхний шигдээсийг өдөөдөг хүчин зүйл болдог болохыг мөн тогтоожээ.
Мэргэжилтнүүд хэт их иддэг стрессийг хоол боловсруулах эрхтэн болон зүрхний үйл ажиллагаатай холбодог аж. Өөх тос, илчлэг ихтэй бүтээгдэхүүн, нүүрс ус ихтэй хоол хүнсийг их хэмжээгээр хэрэглэх нь цусны судсыг нарийсгаж, зүрхний цохилт, цусны даралтыг нэмэгдүүлдэг байна. Энэ үйл явц нь артерийн цусан дахь холестерины хэмжээ ихсэж, цусны өтгөрөлт үүсэхэд хүргэдэг байна.
dobu
