Төлөвлөлтийн хурал амжилттай явагдлаа

“Хааны эрэлд-2024” энхийг дэмжих ажиллагааны олон улсын сургуулийн төгсгөлийн шатны төлөвлөлтийн хурал Улаанбаатар хотноо 2024 оны дөрөвдүгээр сарын 22-26-ны өдрүүдэд амжилттай явагдаж дууслаа. Төлөвлөлтийн хуралд ес орны 71 цэргийн албан хаагч оролцож сургуулийг зохион байгуулж явуулахад шаардлагатай төлөвлөлтийн үндсэн баримт бичгийг боловсрууллаа.

“Хааны эрэлд-2024” энхийг дэмжих ажиллагааны олон улсын сургууль нь “Команд штабын сургалт”, “Салаадын хээрийн сургууль”, “Чадавхыг нэмэгдүүлэх сургалт” гэсэн үндсэн гурван хэлбэрээр 2024 оны долоодугаар сарын 27-ны өдрөөс наймдугаар сарын 8-ны өдрүүдэд Зэвсэгт хүчний сургалтын нэгдсэн төвийн байрлалд зохион байгуулагдана.

Энэ удаагийн “Салаадын хээрийн сургууль”-д Япон Улс, Бүгд Найрамдах Филлипин Улс, Бүгд Найрамдах Солонгос Улс, Бүгд Найрамдах Турк Улс, Америкийн Нэгдсэн Улс, Бүгд Найрамдах Хятад Ард Улс, Катар Улс, Индонез Улс болон Бүгд Найрамдах Энэтхэг Улсын Зэвсэгт хүчний салаад оролцохоор төлөвлөөд байна.

“Чадавхын нэмэгдүүлэх сургалт”-ын хүрээнд Монгол Улсын Агаарын цэрэг, Япон Улсын өөрийгөө хамгаалах агаарын хүчний хамтарсан Агаарын хөдөлгөөний хяналтын сургалтыг анх удаа зохион байгуулна. Мөн Америкийн Нэгдсэн Улсын Зэвсэгт хүчний инженерүүдтэй хамтарсан “Инженерийн сургалт”-ын хүрээнд Улаанбаатар хот - Төв аймгийн Лүн сум чиглэлийн авто замаас Зэвсэгт хүчний сургалтын нэгдсэн төв хүртэлх 18.4 км авто замын трассыг тодотгох, геодезийн хэмжилт, судалгаа хийж авто замын зураг төсөл боловсруулан шаардлагатай санхүү, хүн хүч, техник, тоног төхөөрөмж болон материал хэрэгслийн тооцоог боловсруулахаар төлөвлөж байгаа нь онцлог юм.

Төлөвлөлтийн хурлын хаалтын арга хэмжээнд Батлан хамгаалах яамны Гадаад хамтын ажиллагааны газрын дарга хурандаа Т.Наранхүү оролцож, сургуулийн төлөвлөлттэй танилцлаа.

Эх сурвалж: ЭНХИЙГ ДЭМЖИХ, ЦЭРГИЙН ХАМТЫН АЖИЛЛАГААНЫ ХЭЛТЭС