Гамшгаас хамгаалах улсын хяналтын байцаагч нар мэдлэг, туршлагаа солилцлоо

Төв, орон нутгийн Онцгой байдлын байгууллагын гамшгаас хамгаалах төлөвлөлт, бэлэн байдал хариуцсан ахлах мэргэжилтэн, гамшгаас хамгаалах улсын хяналтын байцаагч нарын сургалтын үеэр Төв аймгийн нутаг дэвсгэрт урьдчилан сонгож, зөвшилцсөн нутгийн захиргааны болон иргэн, хуулийн этгээдийн долоон объектод төлөвлөгөөт бус хяналт шалгалт хийх дадлагыг зохион байгууллаа.

Энэхүү дадлага ажил нь гамшгаас хамгаалах улсын хяналтын байцаагч нарын мэдлэг, туршлагыг солилцох, холбогдох хяналт шалгалтын хууль тогтоомжийг хэрэглэх талаарх мэдлэгийг нэмэгдүүлэх ач холбогдолтой гэдгээрээ онцлог байлаа.

Мөн энэ үеэр ОБЕГ-ын Гал түймэртэй тэмцэх газрын хэлтсийн дарга, хурандаа Д.Баян-Эрдэнэ “Улсын хяналт шалгалт зохион байгуулахад анхаарах асуудал”, ОБЕГ-ын Ажиллагааны удирдлагын газрын ахлах мэргэжилтэн, дэд хурандаа Б.Ганболд “Гамшгаас хамгаалах улсын хяналтын хэрэгжилтийн өнөөгийн байдал, шийдвэрлэх асуудал, 2022 он болон 2023 оны харьцуулалт, үр дүн”, нийслэлийн Прокурорын газрын хяналтын прокурор, хууль цаазын ахлах зөвлөх Н.Алтантүлхүүр “Гамшгаас хамгаалах улсын хяналтын байцаагчаас зөрчлийн хэрэг бүртгэлтийн ажиллагааг хууль, тогтоомжид заасан үндэслэл, журмын дагуу явуулахад анхаарах асуудал” сэдвээр тус тус онолын мэдлэг олголоо.