Оюутан залуусыг хүний эрхийн сургагч багшаар бэлтгэж эхэллээ

“Хүн төвтэй” хууль эрх зүйн шинэчлэлийн хүрээнд оюутан залуусыг хүний эрхийн сургагч багшаар бэлтгэж эхэллээ.

Монгол Улсын Их Хурлын дарга Д.Амарбаясгалангийн 2024 оны 287 дугаар захирамжаар “Хүний эрхийг хангах үндэсний хөтөлбөр-2” төслийг олон нийтэд танилцуулан хэлэлцүүлэх, иргэдийн оролцоог нэмэгдүүлэх ажлын хэсгийг байгуулсан. УИХ-ын Хүний эрхийн дэд хорооны дарга Д.Эрдэнэболдоор ахлуулсан тус ажлын хэсэг өнөөдөр ПСХХ, ХЭҮК-той хамтран “Бидний эрх, бидний оролцоо” сургагч багшийн хөтөлбөрийг хэрэгжүүлж эхлэв.

Төрийн ордонд анх удаа хүний эрхийн үндэсний сургагч багш нарыг бэлтгэх сургалтыг явуулж байгаа бөгөөд энэ удаа хууль, эрх зүйн их, дээд сургуулиудын 100 гаруй оюутан залуус хамрагдаж байна. Хоёр өдрийн турш үргэлжлэх сургалтаар хүний эрхэд суурилсан хандлагын талаар ойлголт, мэдлэг олгохоос гадна “Үзэл бодлоо чөлөөтэй илэрхийлэх эрх”, ”Тэгш эрх”, “Шударгаар шүүлгэх эрх” зэрэг хүний эрх хамгааллын чиглэлээр мэргэшүүлэх хичээлүүдийг заах юм. Мөн тэдэнд “Монгол Улсад хүний эрхийг хангах үндэсний хөтөлбөр-2” хөтөлбөрийн төслийг танилцуулж, саналаа боловсруулахыг даалгасан нь сонирхолтой аж.