Г.Занданшатарын эхнэр Г.Отгонгэрэл “Эрдэнэс силвер ресурс” ХХК-д 45.7 сая төгрөгийн ноолууран цамц “шахжээ”

Салхитын мөнгөний ордын лиценз эзэмшигч төрийн өмчит “Эрдэнэс Монгол” компанийн охин компани “Эрдэнэ силвер ресурс” ХХК нь “Гала кашмер” ХХК-тай 2022 оныарванхоёрдугаар сарын 13-ны өдөр “Нормын хувцас худалдах, худалдан авах” гэрээ байгуулсан байна. Улмаар 2022 оны арванхоёрдугаар сарын 30-ны өдөр “Эрдэнэс силвер ресурс” ХХК-ийн Худалдаа хөгжлийн банкны харилцах данснаас нийт 45.7 сая төгрөг шилжүүлж, 99 ширхэг оффист өмсөх ноолууран цамц худалдан авчээ.

“Гала кашмер” ХХК нь ноолууран цамц нийлүүлэхдээ “Нэгүн кашмер” гэсэн логотой бараа бүтээгдэхүүн нийлүүлсэн байна.

“Нэгүн кашмер” ХХК-ийг судалбал, 2017 оны арванхоёрдугаар сарын 11-ны өдөр байгуулагдсан. Хувьцаа эзэмшигч, эцсийн өмчлөгчөөр Ганбаярын Отгонгэрэл, Батсуурийн Гансувд нар бүртгэгджээ. Ганбаярын Отгонгэрэл нь тухайн үед УИХ-ын даргаар ажиллаж байсан, өдгөө Ерөнхийлөгчийн тамгын газрын дарга Г.Занданшатарын эхнэр юм байна.

“Эрдэнэс силвер ресурс” ХХК-тай ноолууран цамц нийлүүлэх гэрээ байгуулсан “Гала кашмер” ХХК-ийн бүртгэлийг харвал 2018 оны нэгдүгээр сарын 5-ны өдөр байгуулагдсан. Хувьцаа эзэмшигчээр Батсуурийн Гансувд бүртгэлтэй байж байгаад 2022 оны аравдугаар сарын 19-ний өдөр Батсуурийн Гантуяад шилжүүлжээ.

Өөрөөр хэлбэл, Г.Отгонгэрэл нь нөхөр Г.Занданшатарыг УИХ-ын даргаар ажиллаж байхад өөрийн хамаарал бүхий компаниараа дамжуулан төрийн өмчит “Эрдэнэс силвер ресурс” ХХК-д ноолууран цамц “шахжээ”.