Оюутнууд автобусны хөнгөлөлтийг сэргээхийг шаардаж, өргөдөл гаргажээ

Боловсролын тухай хуульд нэмэлт өөрчлөлт орж, оюутнууд нийтийн тээврээр хөнгөлөлттэй зорчих заалт хүчингүй болсон. Улмаар өчигдрөөс буюу нэгдүгээр сарын 1-нээс оюутнууд автобусаар зорчихдоо 1000 төгрөг төлж буй. Харин уг шийдвэрийг Монголын Оюутны Холбооноос эсэргүүцэж гарын үсэг цуглуулж эхэлжээ. 

Тодруулбал, 100 мянган иргэний гарын үсэг бүрдсэн тохиолдолд УИХ-д ажлын хэсэг байгуулан асуудлыг хэлэлцэх журамтай нийтийн өргөдөл гомдлын системд уг өргөдөл байршжээ. Одоогоор шаардлагатай оюутны автобусаар зорчих зардлын хөнгөлөлтийг буцаан сэргээх цахим өргөдөлд 4.800 гаруй иргэн гарын үсэг зуржээ.

Уг өргөдөлд, 

“ТА БҮХНИЙГ ӨРГӨДӨЛД НЭГДЭХИЙГ УРИАЛЖ БАЙНА! 
НИЙТИЙН ТЭЭВРИЙН ХЭРЭГСЛЭЭР ХИЧЭЭЛДЭЭ ЯВАХ ЗАЙЛШГҮЙ ШААРДЛАГАТАЙ ОЮУТНЫ НИЙТИЙН ТЭЭВРИЙН ХЭРЭГСЛЭЭР ЗОРЧИХ ЗАРДЛЫН ХӨНГӨЛӨЛТИЙГ БУЦААН СЭРГЭЭХ ЦАХИМ ӨРГӨДӨЛД ГАРЫН ҮСЭГ ЗУРЖ НЭГДЭНЭ ҮҮ.

Өргөдлийн агуулга:
Боловсролын ерөнхий хуулийг 2023 оны 07 сарын 07 - ны өдрийн УИХ - ын тогтоолоор баталж өмнө нь мөрдөгдөж байсан Боловсролын тухай хуулийг хүчингүй болгосонтой холбогдуулан тус хуулийн 43.2.5 - д заагдсан "нийтийн тээврийн хэрэгслээр хичээлдээ явах зайлшгүй шаардлагатай сурагч, оюутны нийтийн тээврийн хэрэгслээр зорчих зардлын 50 хүртэл хувьтай тэнцэх хэмжээний нөхөн олговрыг аймаг, нийслэлийн иргэдийн Төлөөлөгчдийн Хурлаас тогтоосон журмын дагуу олгох" гэсэн заалт цаашид мөрдөгдөх боломжгүй болсон. Үүнээс үүдэн НИТХ - ын зүгээс цаашид Улаанбаатар хотод суралцаж буй оюутан, суралцагчдын нийтийн тээврээр зорчих зардлын хөнгөлөлтийг санхүүжүүлэх хуулийн үндэслэл байхгүй тул 2025 оны 1 сарын 1 - нээс эхлэн оюутанд олгогдох хөнгөлөлт цуцлагдах нөхцөл байдал үүссэн. Иймд шинээр мөрдөгдөж буй Боловсролын ерөнхий хуулинд оюутны нийгмийн баталгаатай холбогдолтой чухал заалт болох "нийтийн тээврийн хэрэгслээр хичээлдээ явах зайлшгүй шаардлагатай сурагч, оюутны нийтийн тээврийн хэрэгслээр зорчих зардлын 50 хүртэл хувьтай тэнцэх хэмжээний нөхөн олговрыг аймаг, нийслэлийн иргэдийн Төлөөлөгчдийн Хурлаас тогтоосон журмын дагуу олгох" хэсгийг буцаан оруулах саналтай байна” гэжээ.