Ойрын өдрүүдэд агаарын хэм нэмэгдэж Монгол орон даяар аагим халуун үргэлжилж байна. Эл өдрүүдэд хүн нарших болон хэт халалтаас үүдэх арьсны гэмтэл, мөн дотоод эрхтний хяралд орохоос сэргийлэх дараах зөвлөмжийг хүргэж байна.
Халуун байх тусам хүйтэн уух зүйл, зайрмаг зэрэг нь сэрүүцүүлдэг гэж ойлгодог. Гэвч үнэндээ маш богинохон буюу яг тухайн үедээ л хүйтэн байдаг. Ходоод руу орох үед биеийн температур халуун байх тул хоол боловсруулах ажиллагаа улам идэвхэждэг байна.
Ингэснээр хэдхэн хормын дараа ахин халууцдаг. Мөн сахар ихтэй болон үр тариа нь биеийн дулааныг ихээр ялгаруулж мөн задлахад маш их энерги шаарддаг байна.
Тиймээс эмч нар хэт халууны үед хөнгөн, усархаг хүнс, жимс жимсгэнэ хэрэглэхийг зөвлөдөг. Зуны улиралд хүний хоолны дуршил буурдаг тул амин дэмээр баялаг эрүүл хөнгөн хооллох нь тустай. Байцаа, өргөст хэмх зэрэг ус ихээр агуулдаг хүнсний ногоог хоол хүнсэнд түлхүү хэрэглэх нь ходоодыг амрааж эрүүл болгодог байна. Монголчууд хүйтний улиралд мах махан хүнс хэрэглэж, дулааны улиралд айраг цагаан идээ хэрэглэж ирсэн нь бие махбодио амрааж эрүүлжүүлэх эртний арга ухаан юм.
Зуны халуунд нарны шууд тусгалаас хамгаалах хэрэгсэлгүй удаан гадаа байснаар бие хямрах, хордлого авах, нарших эрсдэл бий болдог. Үүнээс хамгаалахад дараах зүйлсийг зөвлөж байна.
Урьдчилан сэргийлэлт:
-Онцын ажилгүй бол гадуур явахгүй байх /наранд аль болох бага явах/
-Нарны нүдний шил, малгай зэргийг тогтмол хэрэглэх.
-Гар, хөл, хүзүү зэргээ наранд ил гаргах хэрэггүй. Учир нь зөвхөн толгойноосоо халснаар наршдаггүй. Нарны тусгалыг шууд хүлээж авч байгаа биеийн бусад хэсгүүдээр ч наршиж болно. Тиймээс хэт халуунд майк, богино ханцуйтай цамц өмсөх биш урт ханцуйтай нимгэн цамц өмсөх
-Наранд удаан хугацаанд байх шаардлага гарвал аль болох битүү хувцас өмсөөд толгойгоо ойр ойрхон норгох юм уу нойтон алчуур, малгай хэрэглэх
-Нярай хүүхдийг гадаа байлгахдаа сүүдрэвчинд мөн чийглэг сэрүүн нөхцөл бүрдүүлэх
-Элсэн шарлага, массаж хийхдээ хэт халах үеийн нарнаас өмнө /9.00-11.00 цаг/, нойтон малгайтай байлгах /үдээс хойш 16.00 цагаас хойш/
-Шингэнийг аль болох олон хэлбэрээр /буцалсан, ширгээсэн ус, хөргөсөн цай, жимсний шүүс, хярам/ ойр ойрхон уулгах
-Хэт хөлдөөсөн зайрмаг, мөс тэс хүйтэн усыг уух нь хоолой өвдөх нөхцөл бүрдүүлдэг тул эцэг, эхчүүд анхаарах
Мөн халууны үед Хар бараан өнгийн хувцас өмсөх нь нарны тусгалыг илүү их шингээж авдаг тул аль болох цайван цагаан, мөн салхи нэвтрүүлэх даавуун хувцас өмсөхийг зөвлөж байна. 
