СУРВАЛЖИЛГА: Малчдын 120 хүүхэд амьдардаг дотуур байранд гал тогооны иж бүрэн тоног төхөөрөмж хандивлалаа

Огноо2024-08-13

СУРВАЛЖИЛГА: Малчдын 120 хүүхэд амьдардаг дотуур байранд гал тогооны иж бүрэн тоног төхөөрөмж хандивлалаа

Эрүүл мэндийн сайд асан, Анагаах ухааны доктор, Клиникийн профессор, Монгол улсын зөвлөх эмч А.Цогцэцэгийн санаачилгаар БНСУ-ын Чунбүк мужийн бизнес хөгжлийн агентлаг Архангай аймгийн лаборатори 1 дүгээр сургуультай хамтын ажиллагааны гэрээ байгууллаа.

Мөн хөдөө сумын ажилчин болон малчдын 120 хүүхэд амьдардаг дотуур байранд гал тогооны иж бүрэн тоног төхөөрөмж хандивласан юм.

Тус гэрээ хэрэгжсэнээр багш нарын чадавхыг сайжруулах, төгсөх ангийн сурагчдад мэргэжлийн чиг баримжаа олгох, улмаар мэргэжлээ сонгоход туслах зорилгоор БНСУ-ын их дээд сургуулийг түшиглэсэн аялал зохион байгуулах, хөдөлмөр сургалтыг дунд сургуулийн ахлах ангийн сурагчдад зориулж насан туршийн боловсрол олгох хүрээнд тоног төхөөрөмж дээр ажиллаж сургах, багш сурагчдын компьютер болон хэлний мэдлэгийг сайжруулах зэрэг давуу талтай аж.

"ХҮҮХДҮҮД ӨДӨР БҮР ХООЛОНДОО ШИНЭ ХҮНС ХЭРЭГЛЭХИЙН ЗЭРЭГЦЭЭ ӨӨРСДӨӨ ХООЛ ХИЙЖ СУРАХ ЮМ"

Эрүүл мэндийн сайд асан, АУ-ны доктор, клиникийн профессор, Монгол Улсын зөвлөх эмч А.ЦОГЦЭЦЭГ:

-Төрсөн нутаг, төгссөн сургуульдаа хөрөнгө оруулалт хийж, БНСУ-ын Чунбүк мужийн бизнес хөгжлийн агентлагтай хамтран хэрэгжүүлж буй төсөл маань амжилттай үргэлжилж байгаад туйлын баяртай байна.

Өнгөрсөн жил эхэлсэн төсөл маань үр дүнд хүрч, өнөөдөр Архангай аймгийн 1 дүгээр сургуулийн дотуур байрны гал тогоонд гурилан бүтээгдэхүүн хийх иж бүрдлийг хандивлалаа. Үүнд:

-Турк улсад үйлдвэрлэсэн цагт 500 аяга таваг угаагч бүрэн автомат машин,

-гурил эсгэгч автомат шкаф,

-гурил болон крем зуурагч,

-шарах шүүгээ,

-талх шарагч багтаж байгаа юм.

Сум, орон нутгийн ажилчин болон малчдын 120 хүүхэд дотуур байранд амьдардаг. Тэдгээр хүүхдүүд өдөр бүр хоолондоо шинэ хүнс хэрэглэхийн зэрэгцээ өөрсдөө хийж сурах юм.

Энэхүү гэрээнд багш нарын чадавхыг сайжруулах, төгсөх ангийн сурагчдыг мэргэжлийн баримжаа олгох улмаар мэргэжлээ сонгоход туслах зорилгоор БНСУ-ын их, дээд сургуулийг түшиглэсэн аялал зохион байгуулах, хөдөлмөр сургалтыг дунд сургуулийн ахлах ангийн сурагчдад зориулж насан туршийн боловсрол олгох хүрээнд тоног төхөөрөмж дээр ажиллаж сургах, багш сурагчдад компьютер болон хэлний мэдлэгийг сайжруулах зэрэг заалтууд тусгагдсан.

"БАГШ, ПРОФЕССОРУУД ХООРОНДОО БОЛОВСРОЛЫН ПРОГРАММЫН КОНТЕНТ СОЛИЛЦОНО"

БНСУ-ын Чунбүкийн Их Сургуулийн, Программ хангамжийг сайжруулах үндэсний хөтөлбөрийн дэд захирал, компьютерын инженерийн тэнхимийн профессор КИМ МИ ХЬЕ: -Чунбүкийн их сургуулийн программ хангамжийн хөгжлийн төслийн баг Архангайн нэгдүгээр сургуультай хамтарч ажиллах гэрээний зорилго нь Чунбүкийн их сургуульд мэдээлэл технологийн мэргэжлээр суралцаж байгаа их сургуулийн оюутнууд Архангайн нэгдүгээр 10 жилийн сургуульд сайн дурын зуны сургалт зохион байгуулах ажлаар багш нар болон профессорууд хоорондоо боловсролын программын контентыг солилцох юм.

Мөн хоёр талын өсвөр насныхан болон оюутнуудыг хооронд нь солилцон суралцуулах, туршлага судлуулах зорилгоор хийсэн санамж бичиг юм. Цаашдаа бидний солилцооны хөтөлбөр эхний ээлжид онлайн хэлбэрээр эхлэн, түүний дараа уулзаж, үргэлжлүүлэн ажиллана.

"ГЭРЭЭНИЙ ХҮРЭЭНД ОЮУТНУУД ИРЖ СУРАЛЦАН, ДАДЛАГА ХИЙН, ХИЙСЭН АЖЛАА АМЬДРАЛ ДЭЭР ХЭРЭГЖҮҮЛЭХ ЮМ"

БНСУ-ын Чунбүк аймгийн Жижиг дунд үйлдвэрлэлийг дэмжих агентлагийн дарга ХО ГЁНГ ЖЭ: -Архангайн ахлах сургууль болон Чунбүкийн ахлах сургуулийн сурагчид хоорондоо хоёр улсын хэл соёлоо суралцан, ажил мэргэжлээ сонгоход нь туслах чиглэлээр дэмжин ажиллах зорилготойгоор хичээн ажиллаж байна. Гэрээний хүрээнд оюутнууд өөрсдийн биеэр айлчлан ирж суралцан, дадлага хийн, хийсэн ажлаа амьдрал дээр хэрэгжүүлэх юм.

Архангай аймгийн ерөнхий боловсролын лаборатори 1 дүгээр сургуулийн захирал А.Дашхорол: -Манай сургууль анх удаа БНСУ-ын Чунбүк аймагтай сурагчид, багш, ажилчдаа хамтын ажиллагаанд нэгтгэж санамж бичигт гарын үсэг зурж байна. Энэхүү гэрээнд нэгдсэнээр манай сургуулийн хүүхдүүд ялангуяа ахлах ангийн хүүхдүүд БНСУ-ын их сургуульд онлайнаар холбогдох, цаашдаа өөрсдөө биеэр очиж сурах нөхцөл боломж бүрдэж байгаа. Мөн БНСУ-ын Чунбүк аймгийн Жижиг дунд үйлдвэрлэлийг дэмжих агентлагтай хамтран ажилласнаар багш, ажилчдын Солонгос Улс руу гарах гарц нь нээгдэж, зуны амралтаараа мэдлэг мэргэжлээ дээшлүүлэх чиглэлээр сурах, ажиллах нөхцөл боломж бүрдэж байгаа юм. Үүнд бид маш их баяртай байгаа. Мөн малчдын 120 хүүхэд амьдардаг дотуур байранд гурилан бүтээгдэхүүн хийх тоног төхөөрөмж хандивлалаа. Тус тоног төхөөрөмжөөр манай хүүхдүүд өөрсдөө үйлдвэрлэл явуулж, гурилан боов, талхаа өөрсдөө хийх боломж нөхцөл бүрдэж байгаа. Өөрсдөө сурч, хөгжиж байгаа. Юмаа өөрсдөө хийнэ гэдэг эко талаасаа бүх нөхцөл боломжийг бүрдүүлсэн бэлэг байна" хэмээн сэтгэгдлээ хуваалцсан юм.

Н.УЯНГА

Хуваалцах: