DOBU.mn сайт аймгуудын Засаг дарга нарын талаарх мэдээллийг цувралаар бэлтгэн хүргэж байгаа билээ. Энэ удаад бид Баянхонгор аймгийн Засаг дарга Долгорсүрэнгийн Мөнхсайханыг онцолж байна.
Баянхонгор аймгийн Засаг дарга Д.Мөнхсайхан бусдад давуу байдал бий болгож, Авлигын эсрэг хууль зөрчсөнийг Авлигатай тэмцэх газар тогтоож байсан. Гэсэн ч тэр өнөөдөр аймгийн Засаг даргын ажлаа хийсээр явна. Түүний өмнөх дарга нар болох Засаг дарга Г.Батжаргал, Иргэдийн төлөөлөгчдийн хурлын дарга Ц.Отгонбаяр нар уул уурайн компаниас тус бүр 100 сая төгрөгийн авлига авсан асуудлаар ажлаа өгч Долгорсүрэнгийн Мөнхсайхан Г.Батжаргалын оронд томилогдож байсан.
Тэрбээр УИХ-ын дарга Г.Занданшатарын дэмжлэгтэйгээр тус албан тушаалд очсоныг Баянхонгорынхон бүгд мэднэ. Нэг үгээр хэлбэл Г.Занданшатарын үгнээс гарах эрхгүйгээр тус албан тушаалыг хашиж байгаа юм. Түүнд ажлаа өгсөн экс Засаг дарга Г.Батжаргал мөн спикерийн хүн гэгддэг.
Гэсэн ч Д.Мөнхсайхан тус аймгийн Шинэжинст суманд үйл ажиллагаа явуулдаг “Эрдэнэ Монгол” компанитай байгуулсан 7.5 тэрбум төгрөгийн гэрээний асуудлаар АТГ-т шалгагдаж байгаа юм. Шалгагдаад дууссан эсэх нь бүү мэд. Мөн бичил уурхайн асуудал, үүн дээр аймгийн Татварын хэлтсийн дарга, Цагдаагийн газрын дарга нарын хамт шалгагдаж байгаа талаараа өөрөө хэлсэн байдаг. Үүнээс үзэхэд УИХ-ын дарга Г.Занданшатарын томилуулсан эхний Засаг дарга авлигын хэрэгт холбогдсон бол одоогийн дарга Д.Мөнхсайхан ч ялгаагүй АТГ-т шалгуулж байна.
Д.Мөнхсайхан АТГ-т гаргадаг Хөрөнгө орлогын мэдүүлэгтээ “Хөвших” ХХК, “Хөвших Од” ХХК, “Их богд зам” ХХК, “Унат” ХХК зэрэг компаниудад хувьцаа эзэмшдэгээ мэдүүлсэн байдаг. Түүний жилийн орлого 40.8 сая төгрөг бол гэрийн бүлийн гишүүдийн орлого нь 302.6 сая төгрөг гэжээ. Энэ нь өмнөх оноос хавьгүй өссөн бөгөөд 2021 онд өөрийн орлого 28.5 сая, гэр бүлийн гишүүдийн орлого 58.7 сая төгрөг байсан юм.
Тэрбээр нэг тэрбум 36 сая төгрөгөөр хэмжигдэх нийтийн хоёр, амины нэг орон сууцтай. Мөн үйлчилгээний хоёр объекттой. 292 сая төгрөгөөр үнэлэгдэх “Тундра” болон “Лексус 570” маркийн автомашинтай. 78.5 сая төгрөгийн газар, 90 сая төгрөгийн хадгаламжтай хэмээн мэдүүлсэн байдаг.
2020 оны орон нутгийн сонгуульд Баянхонгор аймагт МАН ялалт байгуулж, аймагтаа засаглах боломж бүрдсэн. Аймгийн Засаг дарга Г.Батжаргал нь авлигын хэрэгт холбогдсоноор Д.Мөнхсайханд тамга атгах нөхцөл бүрдсэн. Тэрбээр Баянхонгор аймагт төрж, өссөн.
Аймгийн ЗДТГ-ын Хүний нөөцийн ажилтнаар ажлын гараагаа эхэлж, аймгийнхаа “Монгол шуудан” ХХК-ний салбарын захирал, Аймгийн Мэргэжлийн хяналтын газрын даргаар ажиллаж байгаад 2012-2018 онд “Их Богд зам” ХХК-ний захирлын албыг хашиж байсан. Тус компани нь зөвхөн Баянхонгор аймагт зарлагдсан 9 тэрбум төгрөгийн 27 тендерт ялалт байгуулснаас харахад аймгийн авто замтай холбоотой бүх ажлыг “мангас” мэт ганцаараа залгидаг гэсэн үг. Түүнчлэн Нийслэлийн авто замын хөгжлийн газраас зарласан 1.8 тэрбум төгрөгийн тендерт нутгийн нөлөө бүхий залуугаар дамжуулан шалгарсан байх магадлалтай юм.
УИХ-ын дарга Г.Занданшатар нутагтаа ажиллаж байсан хүнийг Засгийн газрын хэрэг эрхлэх газрын дарга болонгуутаа “Эрдэнэс Монгол” ХХК-ийн Санхүүгийн газрын захирлаар томилуулсан байдаг. Түүнээс хойш түүний улс төрийн карьер гэрлийн хурдаар өссөн гэхэд болно. Түүний хөрөнгө орлогын мэдүүлэгтээ дурдсан Баянхонгорын тендерийг ганцаараа түүдэг “Их Богд зам” ХХК түүнийг аймгийн ИТХ-ын төлөөлөгчөөс аймгийн Засаг дарга болох хүртэл үргэлжилсэн байгаа юм.
Аймаг орон нутаг нь хөгжлийн хойно хоцорчихоод байхад “Аймагтаа ганц сайхан намын байр барьчихвал боллоо” хэмээн ярьж суух аймгийн Засаг дарга байгаад хэрэг байна уу. Ийм нэг “даам” гарсан Засаг дарга Баянхонгорт хаан суучихсан, хамаг тендерийг хуу хамсаар байна. Ийм хүн АТГ-ын хаагуур орж, гарч ажлаа хийж суудаг юм бол доо.
Э.БОЛД
