“Эрдэнэс Монгол” ХХК-ийн охин компани болох “Эрдэнэс силвер ресурс” ХХК-ийг энэ сарын 5-ны өдөр “Эрдэнэс алт ресурс” ХХК-тай нэгтгэж, компанийн захирал С.Баярмөнхөөс тамга тэмдгийг нь хураан авсан байдаг. Түүний оронд Эрдэнэт үйлдвэрийн захирал асан, “Эрдэнэс Монгол” ХХК-ийн Зэс, металургийн группын захирал асан Х.Бадамсүрэнгийн ойрын хүн болох Ц.Төгсбуянг Түр орлон гүйцэтгэгчээр томилсон.
“Эрдэнэс Монгол” компанийн Гүйцэтгэх захирал С.Наранцогтоос энэ талаар тодруулахад “Эрдэнэс силвер ресурс” ХХК-ийг “Эрдэнэс алт ресурс” ХХК-тай нэгтгэсэн нь үнэн. Компанийн захирлыг сонгон шалгаруулалт явуулж томилно” гэж байсан юм. Тэгвэл “Эрдэнэс силвер ресурс” ХХК-ийн захирлын марафонд Х.Бадамсүрэн өөрийн хүн болох Ц.Төгсбуянг жинхлүүлэхээр яриа хэлцэл хийж байгаа аж. “Ханаж цаддаггүй, хаашаа янзын бирд шиг хүн бэ. Хөдөлмөрийн баатар хүртэл болоо биз дээ” гэх дургүйцэх хүн олон байгаа гэнэ.
Тэгвэл нөгөө талд нь “экс босс” С.Баярмөнх өөрийн хүн болох “Эрдэнэс силвер ресурс” ХХК-ийн Худалдан авах ажиллагааны газрын захирал Э.Ууганбаярыг Гүйцэтгэх захирлаар томилуулахаар зүтгүүлж байна. УИХ-ын дарга Г.Занданшатартай уулзаж тохироо хийхээр Баянхонгор аймагт хамт яваа юм. Э.Ууганбаяр нь Ерөнхийлөгчийн Тамгын газраас дэмжлэгтэй хэмээн тус компани дотор яригддаг аж. Түүнийг ажил, албан тушаалын байдалтай нь холбогдуулан АТГ-т шалгуулахад буруудах зүйл огт байхгүй. Аливаа төрийн өмчит компанийн захирал, Худалдан авах ажиллагааны газрын дарга, захирлууд л “дээлээ” нөмөрдөг бичигдээгүй хуультай. Худалдан авах ажиллагааны газрыг шалгахад гэмгүй шүү хэд хэдэн эх сурвалж онцолж байлаа.
Х.Бадамсүрэн Хөдөлмөрийн баатар болсон ч компаниудын удирдлагад гар, хөлөө тавих албан тушаалын “дон” дуусаагүй бололтой. Өөрийнх нь улс төрийн өндөр албан тушаалд очих насны карьер өндөрлөсөн ч Ц.Төгсбуян гэхчилэн өөрийн хүмүүсийнхээ шахааг хийж байгаа аж. Мөн аудитаар асар их зөрчилтэй гарсан ч хав даруулж чадсан экс захирал С.Баярмөнх өөрийнхөө оронд Э.Ууганбаярыг томилуулж, ажиллаж байсан үеийнхээ “но”-г даруулах гэж байна гэх хардлага байгаа юм.
Тус компанийн захирлын томилгоотой холбогдуулан “Эрдэнэс Монгол” ХХК-ийн Гүйцэтгэх захирал С.Наранцогтын утсыг улайстал хүмүүсээр яриулж байгаа гэх. “Эрдэнэс силвер ресурс” ХХК-ийн шинэ захирлаар Ц.Төгсбуян, Э.Ууганбаяр нарын аль нь ч бус Ерөнхий сайд өөрийн томилгоог хийх бололтой. Наанаа сонгон шалгаруулалт зарлана гэж ярьдаг ч чин үнэндээ албан тушаалтнуудын дунд хэн нь хүнээ тавих вэ гэдэг марафон болж өнгөрдөг билээ.
Э.ТЭРГЭЛ
[…] эхэлчихээд байгаа талаар бид өмнө нь мэдээлсэн. ЭНД дарж уншина […]