МХХ: Өвөл, хаврын морин уралдаан зохион байгуулахгүй байх тогтоолыг хэвээр үлээнэ

Үндэсний өв соёлоо сэргээн хамгаалах, хадгалж үлдэх уриатай хаврын морин уралдааныг дахин сэргээхээр "Монголоороо байя" морьт жагсаал нэгдүгээр сарын 25-ны өдөр хотын төв талбайд болсон. Үүнтэй холбогдуулан Монголын хуульчдын холбоо захиргааны эрх зүйн хорооны дэргэдэх хүүхдийн эрхийн дэд хорооноос дараах мэдэгдэлийг гаргажээ.

Монгол Улсын дээд шүүхийн 2018 оны 01 дүгээр сарын 15-ны өдрийн 26 дугаар тогтоолоор “Дүнжингарав" хаврын уралдаан зохион байгуулах тогтоолыг хууль бус болохыг тогтоож, цаашид хүүхдийг (18 нас хүрээгүй хүнийг) өвөл, хаврын улиралд морин уралдаанд бэлтгэх, сунгаа хийхэд оролцуулахыг хориглосон акт гаргахыг Монгол Улсын Засгийн газарт даалгаж шийдвэрлэсэн. Улмаар Монгол Улсын Засгийн газраас шүүхийн шийдвэрийг хэрэгжүүлж, 2019 оны 01 дүгээр сарын 30-ны өдрийн 57 дугаар тогтоолоор "жил бүрийн 11 дүгээр сарын 01-ний өдрөөс 05 дугаар сарын 01-ний өдрийн хугацаанд хурдан морины уралдаан, сунгаа, үсэргээ, зохион байгуулахыг хориглосон" тогтоол гарсан билээ.

Өвөл, хаврын морин уралдаан нь хүүхдийн амь нас, эрүүл мэнд, сурч боловсрох эрхийн тодорхой зөрчлүүдийг бий болгодог нь урьд өмнө болж өнгөрсөн харамсалтай үйл явдлууд болон олон тооны судалгаагаар нийтэд илэрхий болсон тул хүүхдийн эрхийг хамгаалах талаарх Монгол Улсын нэгдэн орсон Олон улсын гэрээ конвенц, Монгол улсын Үндсэн хуулийн Арван зургадугаар зүйлийн 11-т "Гэр бүл, эх нялхас, хүүхдийн ашиг сонирхлыг төр хамгаална" гэж заасан заалт болон холбогдох бусад хуулиуд, НҮБ-ын хүүхдийн эрхийн хороо болон Олон улсын Хөдөлмөрийн байгууллагын конвенц, зөвлөмжийн хэрэгжилтийг хангах шинжээчдийн хорооноос Монгол Улсад удаа дараа өгсөн зөвлөмж, шүүхийн шийдвэрийг хэрэгжүүлэн Засгийн газрын 2019 оны 57 дугаар тогтоолыг хэвээр үлдээж, цаашид хүүхдийн эрхийг хангах талаарх хууль тогтоомжийн хэрэгжилт, хяналтыг сайжруулах нь зүйтэй гэж Монголын Хуульчдын холбоо үзэж байна.