Үерийн улмаас орон гэргүй болсон иргэдэд иж бүрэн тавилгатай монгол гэрийг газартай нь олголоо

Наймдугаар сарын 5-нд их хэмжээний усархаг аадар бороо орсны улмаас Баянзүрх дүүргийн 21, 27, 29 дүгээр хороо буюу Дахь-Эх, Монел орчим уруйн үерт автсан. Улмаар дөрвөн хүний эрдэнэт амь эрсдэж, олон иргэн орон гэр, эд хөрөнгөөрөө хохирсон юм.

Нийслэлийн Засаг даргын нөөц хөрөнгөөс амь эрсэдсэн иргэдийн ар гэрт тус бүр хоёр өрөө орон сууц, орон гэргүй болсон иргэдэд иж бүрэн тавилгатай монгол гэр олгохоор болсон билээ.

Газрын зөвшөөрөлгүй 46 өрх үерт өртсөн бөгөөд эдгээр иргэдийг амьдарч байгаа газартай нь хамгийн ойрхон буюу 2-2.5 км зайд таван га газарт нүүлгэн шилжүүлэхээр шийдвэрлэсэн.

Эхний 20 айлын гэр, дэд бүтэц, хүнс, бусад эд зүйлийг хүлээлгэн өгөх бэлтгэл ажлыг бүрэн хангасан байна. Мөн үерээр харамсалтайгаар амиа алдсан нэг иргэний ар гэрт хоёр өрөө орон сууцны дэмжлэг үзүүлж, үлдсэн иргэдийн байрыг тун удахгүй шийдэх ажээ.

ҮЕРИЙН УЛМААС ОРОН ГЭР НЬ СҮЙДСЭН 20 АЙЛД ГАЗРЫН ГЭРЧИЛГЭЭ ОЛГОЖ,
ИЖ БҮРЭН ГЭР БЭЛДЛЭЭ

Нийслэлийн Засаг даргын Эдийн засаг, дэд бүтцийн асуудал хариуцсан нэгдүгээр орлогч Ж.Сандагсүрэн:

-Үерийн гамшигт өртөж, орон гэр нь сүйдсэн 20 айлд газрын гэрчилгээ олгон, иж бүрэн гэр бэлдлээ. Мөн цахилгаан, худгийг шийдэж байна. Шинэ суурьшлын бүс учраас иргэдэд хүндрэл учирч буй тул нийслэл эдгээр асуудлыг үе шаттай шийднэ.

Нийтийн тээврийн үйлчилгээ, цаашлаад замын асуудлыг шийдвэрлэх юм. Нийслэлд үерийн эрсдэлтэй бүсэд буусан 3000 гаруй өрх бий. Үүнийг үе шаттай, яаралтай шийдэх шаардлагатай байна.

Гэрүүдийг ЖДҮ эрхлэгчид үйлдвэрлэж, хөнгөлөлттэй үнээр нийлүүлсэн байна. Мөн гэрийн гишүүдэд зориулж өрх бүрд бүтээгдэхүүнийхээ дээжээс бүрдсэн багц бэлэглэжээ.

ТАВАН ХАНАТАЙ ИЖ БҮРЭН ГЭРИЙГ ҮЙЛДВЭРЛЭЛ ЭРХЛЭГЧДЭЭСЭЭ 30 ХУВИЙН ХЯМРДАЛТАЙ ҮНЭЭР ХУДАЛДАН АВЧ, НИЙЛҮҮЛЖ БАЙНА

Нийслэлийн Жижиг, дунд үйлдвэр, үйлчилгээг дэмжих төв НӨҮГ-ын дарга Г.Гангамөрөн:

-Таван ханатай иж бүрэн гэр зах зээлд 4-5 сая төгрөгийн үнэтэй байдаг. Доторх тавилгууд нь мөн тусдаа үнэлгээтэй. Бид үйлдвэрлэл эрхлэгчдээсээ 30 хувийн хямдралтай үнээр худалдан авч, нийлүүлж байна. Нийслэлийн 120 гаруй ЖДҮ эрхлэгчид үер усанд автсан 105 гаруй өрх болон гэр хүлээн авч байгаа 20 айлын гишүүн бүрд өөрсдийн хийдэг бүтээгдэхүүнийхээ дээж болох эсгий гутал, хувцас, хөнжил, гудас, дэр, цагаан хэрэглэл, ахуйн хэрэглээний зүйлсээс бүрдсэн багцуудыг бэлэглэсэн.

-ҮЕР ТАТАРЧ, МАШИНЫ ЖОЛООЧ НАР ХҮҮХДҮҮДИЙГ МИНЬ АВАРЧ ГАРГАСАН-

Үерт гэр нь сүйдсэн иргэн Т.Нацагдорж:

-Би эхнэр болон хүүхдүүд, охиныхоо дөрвөн хүүхэдтэй, наймуулаа амьдардаг. Гэр рүү ус орж эхлэхээр нь гэрээ тойруулж шуудуу татаж байтал гэнэт үер орж ирсэн. Хүүхдүүд гэрийн урд байсан юм. Хүүхдүүдээ авах гээд явах гэтэл явах боломжгүй болсон. Манай хашаанд маш олон машин урсаж орж ирсэн. Төд удалгүй үер татарч, машины жолооч нар хүүхдүүдийг маань аварч гаргасан.

Манай гэр үерт автаж, лаг шавар орж, авах зүйлгүй болсон. Хүүхдүүдтэйгээ эсэн мэнд байгаадаа, гэртэй болсондоо баяртай байна. Нийслэл болон дүүргийн удирдлагууд, үерийн үеэр нойр, хоолоо умартан, иргэдийн төлөө ажилласан ажилтан, алба хаагч нарт, мөн ЖДҮ эрхлэгч нарт чин сэтгэлийн талархал илэрхийлье.

ЦАХИЛГААНЫ ШУГАМЫГ 1.1 КМ ГАЗРААС ТАТАЖ, ДЭД ӨРТӨӨ, ТООЛУУРЖУУЛАЛТЫН АЖИЛ ХИЙЖ БАЙНА

Тус иргэдийн цахилгааныг 1.1 км газраас татаж байгаа юм. Улаанбаатар цахилгаан түгээх сүлжээ ТӨХК-ийн Ашиглалт засварын зүүн төвийн Ашиглалт үйлчилгээний хэсгийн ахлагч Ж. Батзориг:

-Иргэдийг цахилгаанд холбохоор 21 албан хаагч найман машинтай үүрэг гүйцэтгэж байна. Цахилгааны шугамыг 1.1 км газраас татаж,  дэд өртөө, тоолууржуулалтын ажил хийж байна. Ням гараг буюу наймдугаар сарын 13 гэхэд ажлаа дуусгахаар төлөвлөсөн. Нийт 66 айлыг цахилгаанд холбоно.

Үерийн эрсдэлтэй бүсэд буусан 3000 гаруй өрхийг нүүлгэн шилжүүлэх ажлыг нийслэлээс үе шаттай хийнэ. Энэ ажилд иргэдийн идэвх, санаачилга чухал үүрэгтэй юм. Иймээс иргэд та бүхэн үерийн эрсдэлтэй бүсэд амьдардаг бол НИТХ-аас баталсан 1000 гаруй га газраас сонгон, ирээдүйд үүсэж болох эрсдэлээс сэргийлээрэй.

Эх сурвалж: НЗДТГ-ын хэвлэл мэдээлэл, олон нийттэй харилцах хэлтэс