Японы “Marie Claire” сэтгүүлд жүжигчин Б.Барслхагвын өгсөн ярилцлага нийтлэгджээ. Тус сэтгүүл Монголын уншигчдад зориулан анх удаагаа гадаад хэл рүү орчуулж оруулсан байна. Ярилцлагыг бүрэн эхээр нь хүргэж байна.
“TBS” сувгаар долоо хоног бүрийн Ням гарагт ТВ драма “VIVANT” кино цацагдаж байгаа бөгөөд Масато Сакай, Хироши Абэ, Фуми Никайдо, Казунари Ниномияа, Тоүри Мацузака, Коүжи Якушо зэрэг гайхалтай жүжигчид тоглож байгаа билээ. Түүнчлэн кино өрнөж буй зохиомол орны зураг авалтын газраар Монгол Улсыг сонгож, олон монгол жүжигчин хамтран тоглосон. Тэдгээрийн дотроос гол дүрийн араас уйгагүй хөөцөлдөж яваа орон нутгийн цагдаа Чингисийн дүрийг бүтээсэн Монгол Улсын жүжигчин Батболдын Барслхагва онцгойлон анхаарал татахуйц байсан. “VIVANT” киноны зураг авалтад оролцохоор Япон улсад ирсэн жүжигчин Б.Барслхагватай хийсэн ярилцлагаа та бүхэнд хүргэж байна.
-Анх энэ кинонд тоглох болсон нөхцөл байдал яаж үүссэн бэ?
-2022 оны аравдугаар сард продюсер Казутака Иида, найруулагч Кацуо Фүкүзава нар Монголд ирж, дотоодын 20 орчим жүжигчнийг сонгон шалгаруулалтад оролцуулсан. Тэр үед сонгон шалгаруулалтад оролцчихоод, хариугаа сонсож амжилгүй Унгар улсад өөр киноны зураг авалтад орж байх үедээ тэнцсэн гэсэн хариугаа сонссон. Үнэхээр их баяртай байсан.
-Та Япон улсад анх удаа ирж байна уу?
-Тийм ээ. Энэ оны 1-4 сарын хооронд зураг авалтад оролцохоор ирсэн. Үүний дараа “VIVANT” кинонд оролцсон жүжигчдийн хамт Монгол Улс руу очиж, хоёр сар хагасын хугацаанд зураг авалтаа хийсэн. Улмаар долдугаар сарын сүүлээр Япон улсад буцан ирж, үргэлжлүүлэн зураг авалтдаа орсон. Хоёр дахь удаагаа ирэхэд таксины жолоочоос эхлээд, их олон хүн намайг таньж, хотоор явж байхад өндөр настан, залуучууд, хүүхдүүд “Зураг авч болох уу”, “Та VIVANT-ын Чингис мөн үү?” гэж асуухад надад маш гайхалтай мэдрэмж төрсөн. Яг үнэндээ Япон улсад ийм олон хүн үзэж байна гэсэн төсөөлөл байгаагүй болохоор их гайхаж баярласан.
-Та яагаад жүжигчин болохоор шийдсэн бэ? Мөн өдийг хүртэл ямар дүр дээр түлхүү ажилласан бэ?
-Би хүүхэд байхаасаа л жүжигчин болохоор шийдэж, их сургуульд жүжигчний мэргэжлээр суралцсан. Мэргэжлээрээ ажиллаад 20 жил болж байна. Хамгийн сүүлд Унгар, Англи, Австрали, Монголын хамтран бүтээсэн “1242: Gateway to the West” кинонд тоглосон (2023 оны 11-р сард нээлтээ хийхээр төлөвлөж буй). Энэ кинонд 13-14 дүгээр зуун хүртэл Монголын эзэнт гүрэн ноёрхлоо тэлж, Бат хаан Европ руу байлдаж байгаа үеийн тухай өгүүлдэг. Би Хаш гэдэг Монгол жанжны дүрийг бүтээсэн. Энэ дүр мөн ялгаагүй эсрэг талын дүр байсан. Одоогоор Монголд нийт 25 орчим кинонд тоглосон бөгөөд ихэнхдээ эсрэг дүрд тоглосон. Гэхдээ би өөрөө эсрэг дүрд тоглохдоо маш дуртай. Яагаад гэвэл эсрэг дүрд тоглох нь жүжигчин хүнээс маш их зүйл шаарддаг. Эсрэг дүрд сайн тоглодог жүжигчин хурдан сайжирч хөгждөг гэж боддог.
-“VIVANT” киноны Чингисын дүрд тоглох явцад танд тохиолдсон хөгжилтэй болон хэцүү байсан зүйлээсээ хуваалцахгүй юу?
-Хөгжилтэй болон хэцүү байсан зүйл гэвэл найруулагч Фүкүзава Чингисийн дүрээр үзэгчдийг илүү айлгахыг хүссэн тул надад үсээ хусахыг санал болгосон. Мэдээж жүжигчин хүний хувьд найруулагчийн хүсэл гэдэг бол даргын тушаал гэсэн үг. Гэхдээ “Фантастик продакшн”-ын дараагийн кинонд зориулж би үсээ гурван жил ургуулсан болохоор үсээ хусахгүйгээр дараа нь үс залгаж болох хэмжээний богинохон болгох талаар гуйсан. Гэтэл найруулагч маань “Өө тэгвэл урт үсээ задгай тавиад зураг авалтдаа орчих” гээд, миний нөхцөл байдлыг хүлээн зөвшөөрсөнд би их талархаж байна. Гэхдээ би дотроо ийм урт үстэй цагдааг үзэгчид яаж хүлээж авах бол гэж их санаа зовж байсан ч үнэхээр гайхалтай хүлээж авсан нь надад их таатай санагдаж байна.
Би энэ кинонд Масато Сакай, Хироши Абэ, Фуми Никайдо, Рей Дан нартай хамтран ажиллах боломжтой болсондоо маш их баяртай байсан. Мөн энэ жилийн Каннын кино наадмаас шилдэг эрэгтэй гол дүрийн шагнал хүртсэн Кожи Якушотай хамтран тоглоно гэдэг миний хувьд маш том аз завшаан болсон. Би Америкийн “Саюри (2005)” киног Монголд үзсэн цагаасаа хойш Кожи Якушогийн шүтэн бишрэгч болсон.
Эх сурвалж: MAGIE CLAIRE
Л.ЗУЛ
