Палестины “Хамас” радикал хөдөлгөөнийхөн “Рафах” шалган нэвтрүүлэх боомтоор Газын зурвасыг орхин гарч болох хүмүүсийн жагсаалтыг нийтэлжээ.
Тус бүлэглэлийн цахим хуудаст “Бид арваннэгдүгээр сарын 1-нд шилжилтийн үйл явцыг хөнгөвчлөхийн тулд “Рафах” шалган нэвтрүүлэх боомтоор нэвтрэх боломжтой бусад улсын паспорт эзэмшигчдийн жагсаалтыг нийтэлж байна. Баримт бичигт дурдсан иргэд 07:00 цагт шалган нэвтрүүлэх цэгт ирсэн байх ёстой” гэж бичжээ.
Шалган нэвтрүүлэх боомтод заасан хугацаанаас хоцорч ирсэн иргэдийг хилээр нэвтрүүлэх эсэх талаар мэдээлэл өгөөгүй байна. Жагсаалтыг шөнийн цагаар нийтэлжээ.
“Хамас” бүлэглэлийн нийтэлсэн жагсаалтад Австрали, Австри, Болгар, Индонез, Иордан, Финланд, Чех, Японы иргэд багтсан байна. Түүнчлэн Олон улсын Улаан загалмайн хорооны ажилтнууд болон тус нутаг дэвсгэрт үйл ажиллагаа явуулдаг төрийн бус байгууллагууд (ТББ)-д Газын зурвасаас гарахыг зөвшөөрнө гээд ямар ТББ-уудыг хэлж буйгаа заагаагүй аж.
Жагсаалтад дор хаяж 430 хүн байгаа бөгөөд гадаадын иргэд, олон улсын болон төрийн бус байгууллагын ажилтнуудаас гадна давхар иргэншилтэй палестинчууд багтжээ.
Эх сурвалж: TASS
Э.ЭГШИГЛЭН
