Долоо хоног бүрийн Даваа гарагт УИХ-д суудалтай намын бүлгүүд хуралддаг билээ. Энэ дагуу УИХ дахь АН-ын бүлэг өнөөдөр (2023.12.11) хуралдаж дуусжээ. Хуралдаанаар хээлцсэн асуудлын талаар гишүүд мэдээлэл хүргэж байна.
УИХ-ын гишүүн Ц.Туваан “Бухын доодохыг харсан үнэг турж үхнэ гэж монголчууд ярьдаг. УУХҮЯ-ны шийдвэрийг харсаар бид хүнд байдалд орлоо. Энэ асуудлыг бид зөвхөн өнөөдөр хөндөөгүй. Хоёр сар гаруйн өмнөөс л шатахуун, түлшний хомсдол үүсэж, хүндэрлээ шүү гэж байсан. Гэтэл өнөөдөр бахь байдгаараа. Сайдын хэлж байгаа тайлбар ч өмнөхтэйгөө адилхан байна. Өнөөдөр та нар холбогдох албан тушаалтнуудын амнаас шийдэл сонсов уу. Улаанбаатар хотод таван цаг оочерлож байгаад АИ92 биш, түүнээс хавь илүү 4000 орчим төгрөгийн үнэтэй АИ95 авч байна. Хөдөө орон нутагт үүнээс хүнд байгаа.
Тэнд эрх баригчид шиг АИ95 хийдэг машин унадаггүй. Портер, Бонго гэсэн дизель түлш хэрэглэдэг машинууд унаж, хэрэгцээндээ ашигладаг. Зуд турхан болж байгаа аймгуудад өвөлжөө, хаваржаандаа бууж амжаагүй айл байхыг үгүйсгэхгүй. Дээрээс нь малаа алдчихсан. Малынхаа араас явж чадахгүй, төөрөг нь мэдэг гээд орхиж байна. Хүмүүс малчдыг баян чинээлэг гээд байдаг. Ний нуугүй хэлэхэд чадалтай нь бой хийж, чадалгүй нь тэнгэрт даатгаад, шуурганд уруудуулаад л тавиад орхисон. Араас нь явж чадахгүй, санаа нь зовоод л байж байна.
Зарим компаниуд зуд турхан болж байгаа газруудын малчдад туслах хөдөлгөөн өрнүүлж, хэдэн боодол өвс явуулах гэсэн ч түүнийг нь тээвэрлэх түлштэй машин алга. Иймэрхүү асуудалтай нүүр тулчихлаа. Эрх баригчдын бодлого хаана байна аа.
Сүүлдээ бодож байна, Улаанбаатар хотын түгжрэл багасчихсан. Бензин, шатахууныг нь өгөхгүй байж байгаад түгжрэлийн асуудлыг шийдчихье гэж бодож байгаа юм биш биз дээ.
Агаарын бохирдлыг бууруулах талаар яриад байсан. Автомашинуудыг явуулахгүй болгож, яндангаас нь гарч байгаа утааг алга болгоод, энэ асуудлаа шийдэх гэж байгаа юм биш биз.
Ж.Ганбаатар сайд 2, 3 хоногийн дараа түлшний нөөцийг хэвийн болгоно гэж хэллээ. Сарын өмнө ч ингэж хэлж байсан. Тиймээс үнэмшихгүй байна.
Мөн ард иргэдийг дахиад л хянадаг байдал руу орох гэж байна. Нэг хүн нэг тонн түлш ачаад явж байвал дамлах гэсэн хэрэгт ороод шалгагдах юм байна л даа. Муу л бол арын хар овоохой гэдэг шиг АН руу чихдэг байсан. Өнөөдөр иргэд рүүгээ бурууг чихэж эхэлж байна. Иргэдийг банкаа битгий дүүргээч гэж хэллээ. Ингэж болох уу” гэлээ.
Х.ТҮШИГ
