Нийслэлийн хүн амын хүнсний хангамжийг нэмэгдүүлэх, нийлүүлэлтийг тогтворжуулах зорилгоор нөөцийн махыг есөн дүүргийн 375 цэгээр худалдаалж эхэлсэн. Энэ жил хонины махыг 8900 төгрөг, ямааны махыг 6700 төгрөг, үхрийн махыг 11,350 төгрөгөөр тус тус борлуулах бөгөөд нийт 6337.5 тонн махыг нөөцөлж, бэлтгэжээ. Иргэдээс нөөцийн махны талаар ямар сэтгэгдэлтэй байгааг тодрууллаа.
Сүхбаатар дүүргийн наймдугаар хороо “Саруул” хотхонд байрлах “Миний” сүлжээ дэлгүүрт нөөцийн мах худалдаалж буй. Тус дэлгүүрээр орвол өглөө ирсэн мах хөргөгч дүүрэн байлаа. Оршин суугчдын хөл хөдөлгөөн ихтэй байдаг тухай тус дэлгүүрийн худалдагч “Нөөцийн мах худалдаалагдаж буй эхний өдөр учир одоогоор худалдан авалт нэг их хийгдээгүй л байна” гэлээ.
Иргэд нөөцийн мах хэр амт шим сайтай болон санхүүд хэр хэмнэлттэй байдаг талаарх асуултад дараах байдлаар хариулсан юм.
Иргэн Ч.Цэцгээ: Өмнө жил авдаг л байсан. Энэ жил хараахан худалдаж аваагүй байна. Яах вэ, ер нь дажгүй байдаг юм. Өнгөрсөн жил Булган аймгийн мах авсан санагдаж байна.
Амт шимт нь янз бүр л байдаг. Зарим нь жаахан ясархуу байдаг л юм. Гэхдээ бог малын мах болохоор болоод л байсан.
Иргэн Х.Бямбаа: Одоогоор аваагүй, гэхдээ ойр хавийнхны яриагаар дан яс л байна гэх юм, дараагийн долоо хоногт л орж үзье гэж бодож байна. Амьжиргаанд нэг их дэм болохгүй шүү дээ. Яах вэ, ганц нэг мянган төгрөгийн татуу байдаг гэж бодъё. Гэтэл өнөөх нь амт шим муутай, ихэнх нь яс л байдаг. Бараг нэг мянгаар илүү ч гэсэн Дэнжийн 1000-аас очиж авбал арай хоол болох нь илүү юм даа.
Уг нь хоёр, гурван жилийн өмнөх нөөцийн мах их дажгүй байсан юм. Гуяны мах нь ч ахиу. Одоог бол гуяны мах гэж бараг байхгүй дээ.
Хаа, хүзүү зэргийг богинохон хөрөөдөөд л, гялгар уутанд хийчихсэн. Тэр дотор нь юу байгаа нь төдийлөн харагддаггүй. Илт хямдхан байсан бол ч яая гэх вэ. Ганцхан мянган төгрөгөөр хямд баахан яс авахаар нэг, хоёр л хоол хийнэ. Ам бүл олуулаа айлд бол хэцүү л санагддаг.
Иргэн Ш.Бадам: Нөөцийн мах худалдаалж эхэлсэн талаар өчигдөр телевизээр сонссон. Манай гэр бүл тогтмол аваад байдаггүй юм. Өнгөрсөн жил гайгүйтэй нь таарч байсан.
Сонголт ихтэй болохоор шилж сонгож болдог нь давуу талтай. Зарим нэг амт шимтгүй хальс, яс голдуу нь байдаг л байх. Манайд гайгүй нь л таараад байдаг шүү дээ.
Энэ жилийн хувьд нөөцийн мах аваагүй байна. Захын махны үнэтэй харьцуулж байсангүй гэхдээ гэрт ойрхон болохоор хэрэгтэй л байдаг юм.
Иргэн Ж.Цэнгэл: Манайх нөөцийн мах бараг авдаггүй. Өнгөрсөн жил ганц нэг удаа худалдаж авч байсан, сайн л санагдсан. Үхрийн мах авсан санагдаж байна. Ер нь гологдол гайгүй, их дажгүй байсан юм. Хонь, ямаа жаахан ясархуу байж болох л юм. Үнийн хувьд ч гайгүй боломжийн санагддаг.
Иргэд ийнхүү байр сууриа илэрхийллээ. Жил бүр нөөцийн мах худалдаанд гарсан даруйдаа ийнхүү шүүмжлэл дагуулдаг. Үнийн хувьд нойтон махтай бараг ялгаагүй ч амт чанар нь төдийлөн сайн биш байгаа талаар иргэд ярьж байна.
Мэдээж савлагааны хувьд харилцан адилгүй байсан юм. Зарим уутанд хоёр гурван хэсэг бүхэл мах байсан бол заримд нь хавирга, сээр нуруу зэрэг яс голдуу харагдаж байлаа.
Нийслэлийн хүн амын хоол хүнсний хангамжийг сайжруулах ажлын хүрээнд хийгдэж буй уг ажилд сайшаалтай хандах иргэд ч цөөнгүй байна.
Тэр болгон махны амт чанарыг ялгаж, голж шилэх ч боломжгүй айл өрх нийслэл хотод олон байгаа нь нууц биш. Ингээд бодохоор хэрэгцээтэй хэсэгтээ дэндүү хэрэгтэй, боломжтой нэгэнд харин гологдож мэдэхээр байгаа юм.
Зөвшөөрөл бүхий есөн компани нийт 6337,5 тонн махыг нийслэлийн хэмжээнд нөөцөлжээ.
Зөвшөөрөл бүхий есөн компани нийт 6337,5 тонн махыг нийслэлийн хэмжээнд нөөцөлжээ.А.БАЯР
