ОХУ Пүрэв гарагт АНУ-ын сэтгүүлч Эван Гершкович, тэнгисийн цэрэг Пол Уилан нарыг хүйтэн дайнаас хойших хамгийн том хэмжээний хоригдол солилцох ажиллагааны хүрээнд суллав.
Цагаан ордноос мэдээлснээр, АНУ Орос, Герман болон бусад гурван орон жил гаруйн турш нууц хэлэлцээ хийж, 24 хоригдлыг солилцохоор тохиролцжээ. Үүнээс 16 нь Оросоос Баруун руу нутаг буцсан бол барууны орнуудад хоригдож байсан найман хоригдол Орос эх орон руугаа буцсан байна.
Германы Засгийн газраас дээрх хоригдлуудын дунд Берлинд цөлөгдсөн тэрс үзэлтнийг хөнөөсөн хэргээр ял шийтгүүлсэн Вадим Красиков байсан” гэж мэдэгджээ.
АНУ-ын Ерөнхийлөгч Жо Байден энэ хэлэлцээрийг “дипломат ёс, найрамдлын гавьяа” хэмээн өндрөөр үнэлж, Вашингтоны холбоотнуудын “зоригтой шийдвэр”-ийг сайшаажээ.
АНУ-ын Ерөнхийлөгч Жо Байден “Хүйтэн дайнаас хойших хамгийн том хэмжээний хоригдол солилцох ажиллагааны хүрээнд дөрвөн хоригдол Оросоос эх орондоо ирж байна” гэж мэдэгдэв.
Тэрбээр “Wall Street Journal” сонины сурвалжлагч Эван Гершкович, мөн Пол Уилан, Алсу Курмашева, Владимир Кара-Мурза нар суллагдсан бөгөөд “тэдэнд тулгарсан харгис, хэрцгий сорилт дуусгавар боллоо” гэж хэлжээ.
ОХУ-аас сулласан хоригдлууд Пүрэв гарагт Мэрилэнд мужийн “Эндрюс” нэгдсэн баазад газардсан бөгөөд Байден, дэд ерөнхийлөгч Камала Харрис болон тэдний ар гэрийнхэн угтан авсан байна.
ОХУ-ын Ерөнхийлөгч Владимир Путин “Москвад буцаж ирэх хоригдлуудыг хүлээн авч уулзан, тэдэнд төрийн шагнал гардуулна” гэж мэдэгджээ.
Байден өмнө нь Цагаан ордонд, суллагдсан хоригдлуудын төрөл төрөгсдийн дэргэд “Өнөөдөр энэ дэлхий дээр найз нөхөдтэй байх нь чухал байдгийн хүчтэй жишээ энэ юм” гэж хэлсэн байна.
Байден Красиковыг суллах хэцүү сонголт хийсэн Германы канцлер Олаф Шольцод талархах өртэйгөө мэдэгджээ.
Энэхүү хэлэлцээр нь АНУ-ын ерөнхийлөгчийн сонгуулийн кампанит ажил сүүлийн сардаа орж байгаа энэ үед Байдены засаг захиргаанд дипломат амжилт болж буй ч олон улсын хэлэлцээр нь АНУ-Оросын харилцааг сэргээгээгүй, зөвхөн нэг удаагийн солилцоо аж.
АНУ-ын Үндэсний аюулгүй байдлын албаны орлогч зөвлөх Жон Финер CNN-д ярилцлага өгөхдөө “Хоригдлууд солилцсон ч Америк, Оросын харилцаа “адармаатай” хэвээр байна. Энэ харилцаа, хэлэлцээрт ямар ч итгэлцэл байгаагүй” гэж хэлжээ.
Шүүмжлэгчид “Онц ноцтой гэмт хэрэг үйлдсэн оросуудыг суллах нь АНУ-ын дайснуудад барьцаалагдах явдлыг нэмэгдүүлнэ” гэж үзэж байгаа аж.
Трамп “Солилцооны талаар дэлгэрэнгүй мэдээлэл байхгүй” гэж мэдэгдээд “алуурчид, дээрэмчид” суллагдсан эсэхийг асуужээ. Бүгд найрамдах намаас ерөнхийлөгчийн сонгуульд нэр дэвшигч тэрбээр олон нийтийн сүлжээнд “Бид хэзээ ч сайн наймаа хийдэггүй, тэр дундаа барьцааны хүмүүсийг солилцдог учраас л сонин байна” гэж бичсэн байна.
Хэвлэлүүд Оросын тагнуулын албаны хурандаа Вадим Красиков солилцоонд хамрагдан суллагдсан тухай мэдээлжээ.
Хоригдол солилцох хэлэлцээрт Польш, Словени, Норвеги, Беларусь зэрэг улсууд оролцож, Турк зохицуулагч хийсэн байна.
Кремль мэдэгдэлдээ “Гадаадад хоригдож байгаа Оросын иргэдийг буцаах зорилгоор хоригдлуудыг өршөөж, суллах шийдвэр гаргасан” гэжээ.
Эх сурвалж: REUTERS, BBC, CNN
Д.ТУЯА
