Хан-Уул дүүргийн 20 дугаар хороонд үйл ажиллагаа явуулж байгаа арьс, ширний үйлдвэрүүдийг нүүлгэн шилжүүлэхээр төлөвлөж байгаа ажээ.
“Эмээлт эко аж үйлдвэрийн парк” ХК-ийн Гүйцэтгэх захирал Б.Мягмарын мэдээлснээр, “Эмээлт эко аж үйлдвэрийн парк”-ийн арьс ширний бүсийн техник, эдийн засгийн үндэслэлийг боловсруулж эхэлсэн бөгөөд 2024 оны хоёрдугаар сард дуусгахаар ажиллаж буй юм байна.
Б.Мягмар мэдээлэхдээ “Хан-Уул дүүргийн 20 дугаар хороонд үйл ажиллагаа явуулж буй арьс, ширний үйлдвэрүүдийг нүүлгэн шилжүүлсний дараа, хөрс, усны бохирдлыг цэвэрлэх, тухайн орчинд нөхөн сэргээлт, дахин төлөвлөлт хийх зэрэг ажлуудын бэлтгэлийг хангах шаардлагатай байна.
“Эмээлт эко аж үйлдвэрийн парк”-ийн нийт төлөвлөлт 539 га талбайд хэрэгжиж буй юм. Арьс, ширний бүсэд Дэлхийн банкны төслөөр дэд бүтэц болон Хан-Уул дүүргийн 20 дугаар хороон дахь үйлдвэрүүдийг нүүлгэн шилжүүлэх ажлыг хийнэ.
Мах боловсруулах, дайвар бүтээгдэхүүн, ноос, хүлэмжийн аж ахуй зэрэг бусад аж үйлдвэрийн бүсүүдийг хөгжүүлэх бэлтгэл ажлыг хангаж, төр, хувийн хэвшлийн түншлэлээр төслүүдийг хэрэгжүүлэх судалгааны ажлуудыг холбогдох нэгжүүд хийж байна.
“Эмээлт эко аж үйлдвэрийн парк”-т гол барьж байгаа бодлого олон улсын стандартыг хангах, экспортыг дэмжих, ажлын байр нэмэгдүүлэх. Энэ хүрээнд байгаль орчинд ээлтэй, хаягдалгүй төлөвлөлт хийж байна” гэв.
Э.ЭГШИГЛЭН
