Нийслэлийн Засаг дарга бөгөөд Улаанбаатар хотын захирагч Д.Сумъяабазар, Монгол Улсын сайд, Түгжрэлийг бууруулах үндэсний хорооны дарга Ж.Сүхбаатар нар “ногоон автобус”-ны дуулианаар ажлаа өгсөн. Үүний оронд Л.Оюун-Эрдэнийн баруун гар Хууль зүй, дотоод хэргийн сайд Х.Нямбаатарыг Хотын дарга, “түгжрэл”-ийн сайдаар УИХ-ын гишүүн Б.Дэлгэрсайхан нарыг томилсон.
Ямар ч хүнийг даргаар тавьсан Монгол Улсын хүн амын талаас илүү нь ажиллаж, амьдардаг Улаанбаатар хотын асуудал дундарна гэж байхгүй. Тиймээс ямар ч сайн улстөрч дарга болж ирсэн иргэдийн бухимдал байсаар байх болно. Хүн байгаа цагт булхай, луйвар байсаар ч байна. Үүнтэй санал нийлж, өөгшүүлж байгаа мэт уншигдах боловч бидний бодит үнэн энэ.
Хотыг “залуурдахад” менежмент сайтай менежерийн ухаан хэрэгтэй. Бид цаг ямагт инженер хэрэгтэй гэж орилдог ч үнэн чанартаа хэзээ ч хэрэгжиж байгаагүй. Үүний нэг жишээ нь, Сонгинохайрхан дүүргийн ИТХ-аас Хууль зүй, дотоод хэргийн сайд болсон Х.Нямбаатар өөрөө.
Хуулийн салбартаа шинэчлэл хийнэ хэмээн лоозогнож, УИХ, Засгийн газрын 26 ажлын хэсгийг ахалж байсан хүн нэг л өдөр Хотын дарга болчихсон. Сүүлийн жилүүдэд хуулийн чиглэлээр дагнасан болохоос хотын амьдралыг Сонгинохайрхан дүүргээр төсөөлж байгаа гэдэгтэй мөрийцсөн ч болно.
Монголын төрд сүүлийн хэдэн жил цагдаажих, хуульжих процесс асар хурдацтай явсан. АТГ нь цагдаажсан, прокурор нь ч цагдаажсан. Үүний араас нийслэл нь цагдаажиж байна. Хотын шинэ дарга Х.Нямбаатар Нийслэлийн Цагдаагийн удирдах газрын дэд дарга Д.Отгонжаргалыг томилов.
Өмнөх дарга С.Жавхлантбаатар ч мөн цагдаа. Нийтийн тээврийн салбарт цагдаа нарын хийх ажил байна уу. Хулгай, булхай гаргахгүй гэж байгаа хяналтаа сайжруулах ёстой болохоос цагдаагаар дарга тавина гэдэг салбарыг бүхэлд нь унагаж байгаагаас өөрцгүй. Автобусны ганц эрэг, боолтоос эхлээд мэдлэг нь дутах хүмүүсээр дарга тавих нь хэнд хэрэгтэй юм бэ.
Х.Нямбаатар сайдын болон УИХ-ын гишүүний ажлаа өгсөн. Давхар дээлээ тайлаад очиж байгаагаас харвал Хотын даргын мест ямар үнэ цэнтэй гэдэг нь харагдана. Хот руу очихдоо тэр яамныхаа Төрийн нарийн бичгийн дарга П.Сайнзоригийг нэгдүгээр орлогчоор, хоёрдугаар орлогчоор УИХ-ын даргын зөвлөхөөр ажиллаж байсан, хуульч, судлаач О.Номинчимэгийг, НЗДТГ-ын даргаар ХЗДХ-ийн яамны Санхүүгийн газрын даргаар ажиллаж байсан Л.Хосбаярыг, хуулийн зөвлөхөөрөө ХЗДХ-ийн яамны Хууль зүйн бодлогын газрын даргаар ажиллаж байсан Д.Цолмонг томилсон.
Нэг талаасаа хуульчдын баг очиж байгаа нь маш сайн. Хулгай нь багасч, сиймхий ч намдах байх. Гэхдээ хуульчид хотын амьдрал мэдэх үү. Хуульчид хотыг хөгжүүлэх үү гэдэг асуулт байна. Яг үнэндээ энэ томилогдсон хүмүүсийн хэд нь гэр хороололд амьдарч үзсэн бэ. Долоон буудлын Должин эмгэнд юу хэрэгтэй байна, Баянхошууны эцэст иргэд юунд тэмүүлж байгааг мэдэх хүн бараг үгүй. Нэг үгээр хэлбэл, цагаан цаас шиг хүмүүс хотын “халтар” бидний амьдралыг мэдэх гэж хамаг цагаа барна.
Гэр хорооллын иргэдтэй гар барьчихаад, нүүрэн дээр нь нойтон сальфеткаар гараа арчиж зогсохдоо юу ч боддоггүй тийм л хүмүүсээр хотыг удирдуулна гэвэл асар хүнд. Дагуулж ирсэн дарга нар нь өөрт чинь тус хүргэх үү, бүх зүйлдээ өөрөө гүйх үү гэдгээ бодно биз. Наад хэдэн дарга чинь хотоо судалсаар байтал хойтон жилийн сонгууль болно.
УИХ, Засгийн газрын өмнө 26 ажлын хэсэг ахалж байгаад хаяад явсан шигээ хотын иргэдээ буман асуудалтай нь орхиод явахгүй гэх баталгаа бий юу, Хотын дарга аа. Хяналт шалгалт явуулсаар байтал чинь энэ хот чинь хөлдөж мэднэ, хөлд чирэгдээд өнхөрч ч мэдэхээр байна. Хулгайг өөгшүүлж байгаа юм биш. Хууль хяналтын хүмүүсийнхээ томилгооны жин банг нь тааруулаарай гэж байгаа юм.
Эцсийн эцэст удирдах шатны дарга нар яаж ч хичээж ажилласан анхан, дунд шатныхан чинь ажлыг чинь хийхгүй, авлига нэхдэгээс болж хариуцлагыг нь дарга нь үүрдэг гэдгийг мартаж болохгүй. Тэдний хувьд дарга бол ирээд буцдаг нүүдлийн шувуу. Өөрсдөө бол хэн ч ирсэн байж л байдаг шавар бурхан болчихсон гэдгийг эрх биш гадарлах байлгүй дээ.
Э.ТЭРГЭЛ
