Монголын сагсан бөмбөгийн холбоо (МСБХ)-ны үндэсний дээд лигийн 2023-2024 оны улирал энэ Баасан гарагт эхэлнэ. Гэвч “BCH Гарьд”, “IHC Apes”, “Эрдэнэтийн Уурхайчид”, “Завхан Brothers”, “Тэнүүн Өлзий Металл” зэрэг багийн эзэд болон Монголын сагсан бөмбөгийн холбооны хооронд үл ойлголцол гарсны улмаас дээрх багууд энэ улирлын дээд лигт орох боломжгүй болсон юм. Энэ асуудлаар “Ирээдүй” холбооны гишүүн тамирчид хэвлэлийн бага хурал хийлээ.
“Хасын хүлгүүд” багийн тамирчин, ОУХМ Б.Билгүүн “Хоёр талын үл ойлголцлоос болж таван баг Дээд лигт орж чадахгүй хэмжээнд эрсдэлд орчихоод байна. Манай баг багийн эздийнхээ шийдвэрээр Дээд лигт орохоор болсон. Гэхдээ би энд хувь тамирчныхаа байр суурийг илэрхийлэхээр ирлээ.
Миний хувьд тамирчид нэг лигт тоглох нь зөв гэж бодож байна. Тийм ч утгаар бид өнөөдрийг хүртэл бэлтгэлээ хийж байсан. Гэтэл багийн эзэд болон холбоо хоорондын асуудал гараад ирлээ. Лиг эхлэхээс долоо хоногийн өмнө ийм байдал үүссэнд харамсаж байна.
Холбооны зарчим, дүрмийг дагаж мөрдөх ёстой. Хэрэв зөрчсөн тохиолдолд сануулга өгөх, мөнгөн торгууль оногдуулах байдлаар арга хэмжээ авдаг болох нь зөв байх.
Ер нь удирдлагуудын хооронд ямар ч асуудал үүсэж болно. Гэсэн ч тамирчдаа заавал нэг лигт тоглуулах хэрэгтэй. Талууд ойлголцож, тамирчид нэг лигт тоглох хүртэл “Хүлгүүд” багийн бүрэлдэхүүнд тоглохгүйгээ мэдэгдэж байна” гэлээ.
Х.ТҮШИГ
