Россельхознадзор “Арванхоёрдугаар сарын 19-нд Азербайжанаас 36 тонн (612 мянган ширхэг) хүнсний өндөгний эхний багцыг ОХУ-д борлуулахаар Яраг-Казмалярын шалган нэвтрүүлэх боомтоор оруулж ирээд байна” гэж мэдэгджээ.
ОХУ-ын Хөдөө аж ахуйн сайд Дмитрий Патрушев өнгөрсөн Ням гарагт ойрын хугацаанд Азербайжан, Туркээс импортын, татваргүй өндөг нийлүүлнэ гэж зарласан бөгөөд ингэснээр үнийн зохицуулалт хийх боломж бүрдэнэ гэж холбогдох албаныхан тооцсон байна.
Хүнсний бүтээгдэхүүн үйлдвэрлэгч, нийлүүлэгчдийн холбооны удирдах зөвлөлийн орлогч дарга Дмитрий Леонов (Руспродсоюз) “Тахианы өндөгний жижиглэнгийн үнэ сүүлийн 10 жилийн дээд түвшинд хүрсэн ч шинэ он гармагц буурч эхэлнэ” гэж хэлжээ.
ОХУ-д арванхоёрдугаар сарын 11-нээс 17-ны хооронд долоо хоногт дунджаар арван өндөгний жижиглэнгийн үнэ 121.8 рубль хүрсэн нь 2013 оноос хойшхи сүүлийн 10 жилийн дээд “амжилт” аж. Леонов хэлэхдээ импортыг хөхиүлэн дэмжсэнээр үнийн өсөлтийн дарамт улам нэмэгдэхийг онцолжээ.
ОХУ-д тахианы өндөг оны эхнээс 46 хувиар өсч, өсөлтийн хурд нь хараахан буураагүй байгаа аж.
Оросын Ерөнхийлөгч В.Путин өнгөрсөн Пүрэв гарагт өндөг, тахианы махны үнийн байдлын талаарх асуултад хариулахдаа үнийн өсөлтийг эрэлт нэмэгдсэн ч үйлдвэрлэл нэмэгдээгүй, импортыг хугацаанд нь нээгээгүйтэй холбон тайлбарлажээ.
ОХУ-ын Хөдөө аж ахуйн сайд Дмитрий Патрушев өчигдөр (2023.12.19) шинэ он гарсны дараа тахианы өндөгний үнэ буурч эхэлнэ гэж найдаж буйгаа илэрхийлсэн байна. Мөн тэрбээр “Эрх баригчид өндөг, шувууны аж ахуй эрхлэгчдийг илүүтэй дэмжиж, жижиглэн худалдааны сүлжээдтэй шууд гэрээ байгуулахыг дэмжиж байна” гэж хэлжээ.
Эх сурвалж: RIA NOVOSTI
Э.ЭГШИГЛЭН
