“Парис 2024” зуны олимп хаяанд иржээ. Олимпын наадмын нээлт долоодугаар сарын 26-нд болно. Нээлтэд Монгол Улсын тамирчдын өмсөх ёслолын хувцсыг “Michel & Amazonka” брэнд урлаж, танилцуулсан нь зарим иргэдийн шүүмжлэлийг хүртээд байна. Тус хувцасны талаар дэлгэрэнгүй мэдээллийг хүргэе.
“Парис 2024” олимпын наадамд оролцох Монголын баг тамирчдын хувцасны үйлдвэрлэгч болон загварыг сонгон шалгаруулахаар 18-60 насны 9,222 иргэн, Үндэсний шигшээ багийн 303 хүний дунд санал асуулга явуулжээ. Улмаар баг тамирчдын ёслолын хувцсыг “Michel & Amazonka” брэнд, спортын хувцсыг “Mizuno” брэнд урлахаар шийдвэрлэсэн байна.
“Michel & Amazonka” брэндийн хамт олон 2020 оны Токиогийн зуны олимп болон 2022 оны Бээжингийн өвлийн олимпод оролцсон тамирчдын хувцсыг мөн урлаж байсан билээ.
-ЁСЛОЛЫН ХУВЦАС НЬ “ТУГЧНЫ” БОЛОН “ПАРАД” ГЭСЭН ХОЁР ТӨРӨЛТЭЙ-
Тугчны хувцас нь дээл болон хантаазаас бүрджээ.
Харин парад хувцасны иж бүрдэлд дээл, хантааз, монгол цамц, өмд зэргийг багтаасан байна.
-МАТЕРИАЛЫН ТУХАЙД НИМГЭН ТОРГО БОЛОН ШИФОНООР УРЛАЖЭЭ-
Ёслолын хувцасны зургийг харсан зарим хүмүүс материал нь зуны халуунд тохиромжгүй, зузаан байна хэмээн шүүмжилж байна. Харин үүнийг Michel & Amazonka брэнд дараах байдлаар тайлбарлажээ.
Үндсэн дээлийг зуны улиралд тохирсон нимгэн торго болон шифоноор хийсэн. Тус материалууд нь хүний биед харшил өгөхгүй, аливаа бохирдлыг хялбараар цэвэрлэх боломжтой, хөлөрч, норсон тохиолдолд хурдан хугацаанд хатдаг давуу талтай аж. Хантааз нь мөн л салхи нэвтэрдэг, хөнгөн даавуун материалтай.
-ХАНТААЗАНД ШИГТГЭСЭН ДЕТАЛИУДЫН ТУХАЙ-
Хантаазыг ажвал есөн хөлт цагаан туг, олимпын бамбар, алхан хээ, өлзий хээ, монгол зургийн хэв маягтай уул, үүл, төрийн сүлдний нар, сар болон гурван дөлт гал гэхчлэн алтан утсаар шагласан хатгамлуудыг шигтгэжээ. Эдгээр нь бүгд Монголын ард түмний аз хийморийн бэлгэдлүүд бөгөөд нэг бүрчлэн дүрслэн оруулж үндэсний хээ угалзаар баяжуулсан нь утга агуулгын хувьд дахин давтагдашгүй гэдгийг Michel & Amazonka-гийн зүгээс тайлбарласан байна.
-ХАНТААЗАНД БУЙ НӨМРӨГ БА ХУВЦАСНЫ ӨНГӨНИЙ ТУХАЙ-
Хантаазны нуруу хэсэгт нөмрөгийг хийсэн нь анхаарал татаж байв. Энэ нь дарвуулт завин дээр явахад салхины аясанд намирч харагдах зориулалттай ажээ.
Мөн дээлийн ханцуйд Хүннү үеийн харваач нударга хийсэн нь цэмцгэр харагдах ба өрсөлдөөнд бэлэн эрэлхэг дайчны төрхийг илэрхийлж байгаа гэв.
Загваруудын их бие цагаан болон хул өнгөтэй, деталиуд нь мөнх хөх тэнгэрийн хөх, мандан бадрахын улаан болон алтлаг өнгөтэй байгаа нь зуны уур амьсгалтай нийцэхээс гадна харилцан уялдаатай, хээнцэр өнгө аястай харагдуулахыг зорьсон байна.
Х.ТҮШИГ
