Сум, хороонд ажиллах 833 нийгмийн ажилтныг бэлтгэх ажил эхэллээ

Хүүхэд хамгааллын тухай хуулийн шинэчилсэн найруулгад сум, хороо бүрд хүүхэд, гэр бүлтэй ажиллах нийгмийн ажилтан ажиллах цоо шинэ зохицуулалт орсон.  Тодруулбал, Засгийн газрын 2024 оны арван хоёрдугаар сарын 25-ны өдрийн 237 дугаар тогтоол гарч, орон нутагт 565, нийслэлд 268, улсын хэмжээнд нийт 833 нийгмийн ажилтан ажиллахаар шийдвэрлэсний дагуу Гэр бүл, хөдөлмөр, нийгмийн хамгааллын яам, түүний харьяа байгууллагуудын ажилтан, албан хаагчид болон мэргэжлийн холбоод, Их дээд сургуулийн багш, зөвлөх, судлаачдын төлөөллөөс бүрдсэн 40 оролцогчийг өнөөдрөөс (2025.02.03) эхлэн сургагч багшаар бэлтгэж байна. 

Эдгээр сургагч багш нар шинээр ажиллаж эхлэх сум, хорооны нийгмийн ажилтнуудын мэргэжлийн ур чадварыг нэмэгдүүлэх, ажлын байранд чиглүүлэх, мэргэшүүлэх сургалтыг 2 дугаар сарын 10-ны өдрөөс 14-ны өдрүүдэд орон нутагт зохион байгуулах юм.

Цаашид хүүхэд, гэр бүлийн асуудал хариуцсан нийгмийн ажилтны мэргэжлийн ур чадварыг сайжруулахад чиглэсэн ахисан түвшний, мэргэшүүлэх сургалтуудыг олон хэлбэр, төрөл, үе шаттайгаар зохион байгуулах, сургалтын агуулга, хөтөлбөр, сурах бичгийг цахимжуулах зэрэг ажлуудыг гүйцэтгэхээр оролцогч талуудтай хамтран ажиллаж байгаа аж.

Хүүхэд, гэр бүлтэй ажиллах нийгмийн ажилтнууд хүүхдийн эсрэг хүчирхийлэлтэй тэмцэх, хүчирхийлэлд өртсөн хүүхдэд шуурхай тусламж үзүүлэх, эрсдэлт нөхцөлийг эрт илрүүлж, эрсдэлээс урьдчилан сэргийлэх болон хүүхэд хамгааллын үйл ажиллагаанд оролцогч байгууллагуудыг холбох, хүүхдийн зөрчигдсөн эрхийг сэргээхэд чиглэсэн хамгааллын үйлчилгээ үзүүлэх юм.