Үндсэн хуулийн нэмэлт, өөрчлөлтийн төслийг боловсруулсан ажлын хэсэг мэдээлэл хийлээ. Энэ үеэр Ерөнхийлөгч асан Н.Энхбаяр сэтгүүлчдийн асуултад хариулсныг хүргэе.
-Одоогийн Үндсэн хууль чадамжгүй болоод шинэ Үндсэн хууль батлах гэж байгаа юу. Засаглалын тогтолцоо, гишүүдийн тоог олон болгож, сонгуулийн тогтолцоог өөрчлөх зорилготой байна уу. Өчигдөр ЗГХЭГ-ын Д.Амарбаясгалан “Бид Үндсэн хуульд өөрчлөлт оруулах захиалга өгөөгүй” гэсэн. Эдгээр асуултад хариулт өгөөч?
-1992 онд батлагдсан Үндсэн хууль бол маш чухал хууль байсан. Тухай үед бид шинэ тогтолцоо руу шилжихээс өөр аргагүй байдалд байлаа. Нам төвтэй нийгмийн харилцаанаас төр төвтэй нийгмийн харилцаа руу шилжсэн. Мөн УИХ бол төрийн эрх барих дээд байгууллага гэж үзээд бүх эрх мэдлээ өгсөн. Үндсэн хуульд тэгж зохицуулснаас үүдэн хяналтаас төр, засаг хяналтаас гарчихсан. Хяналтаас гарсан төрийн хулгайг хэн ч зогсоож, хянаж чадахгүй байна. Тиймээс иргэд төр засгаа хянадаг, иргэн төвтэй Үндсэн хуультай болох нийгмийн захиалга ирж байна. Тиймээс 1992 оны Үндсэн хуулийг шинэ Үндсэн хуулиар солих нь ард түмэнд хамгийн хэрэгтэй.
-Та бүхэн ард түмнийг төлөөлж чадаж байгаа юу. Ард түмний нэрийг барин Үндсэн хуульд дураараа гар хүрч байна гэх хардлага байна?
-20 гаруй нам Үндсэн хуульд өөрчлөлт хийе гэж тунхагт бичигт гарын үсэг зурсан. Зөвлөлдөх зөвлөл байгуулах тухай хэлэлцүүлэгт Ерөнхий сайд илтгэл тавьж, Өөрчлөхгүй байх, тодорхой өөрчлөлт хийх, шинэ Үндсэн хууль боловсруулах гэсэн гурван гарц байгааг танилцуулж, дэмжихэд бэлэн байгааг илэрхийлсэн. Ерөнхий сайдын илтгэлийн гол агуулга шинэ Үндсэн хууль хийхээс өөр аргагүй гэх агуулгатай байсан.Төр засгийн тогтолцоо ард түмний төлөө байх ёстойг бид дөнгөж сая ойлголоо. Би хувиасаа 7.8 сая төгрөг гаргаж, Үндсэн хуулийн төслийг 1000 ширхэг хэвлүүлсэн.
