Архангай аймгийн Эрдэнэбулган сумын 6-р багийн нутагт байрлах “Хасу шивэрт” рашаан сувиллын газарт хохирогч Г нас барсан гэх асуудлаар өчигдөр хохирогчийн ар гэрээс хэвлэлийн бага хурал хийсэн. ЦЕГ-аас өнөөдөр (2023.06.29) дараах мэдээллийг өглөө.
ЦЕГ-ын Мөрдөн байцаах албаны дарга Н.МИШИГДОРЖ:
-Цагдаагийн байгууллагад 2022 оны долдугаар сарын 9-ний өдөр “Хасу шивэрт” рашаан сувиллын газарт хүн нас барсан байна гэх дуудлага, мэдээлэл ирсэн. Дуудлага, мэдээллийн дагуу Архангай аймгийн цагдаагийн алба хаагчид очиж, мөрдөн шалгах ажиллагаа явуулж, шүүхийн шинжээчид дүгнэлт гаргасан.
Мөн мөрдөн шалгах ажиллагааг УЕП-ын 2020 оны А33 дугаар тогтоолоор баталсан журмын дагуу тус мөрдөн байцаах албанд харъяалал тогтоосон. Одоо тус мөрдөн байцаах албаны Тусгай субъект, гэмт хэрэг мөрдөн шалгах хэлтсийн даргаар ахлуулсан ажлын хэсэг мөрдөн шалгах ажиллагаа явуулж байна.
Хохирогчийн хууль ёсны төлөөлөгч шүүхийн шинжилгээг дахин хийлгэх хүсэлт гаргаж, гурван шинжээчийн дүгнэлт гарсан. Тухайн дүгнэлтийг эс зөвшөөрч, дахин бүрэлдэхүүнтэй шинжээч гаргахыг хүссэн. Энэ хүсэлтийн дагуу ШШГЕГ-аас 2, ЭМЯ-наас 5 хүний бүрэлдэхүүнтэй шинжээч томилон ажиллаж байна.
