УИХ-ын чуулганы нэгдсэн хуралдаан гишүүдийн асуулт, хариултаар үргэлжилж байна.
Их тойруу дотор 1500 өндөр барилга барих А даалгавар авсан,
зөвшөөрлийг өөр газар луу шилжүүлэх зохицуулалт хийнэ
УИХ-ын гишүүн Х.ГАНХУЯГ: -Барилгын өндөржилт дээр хязгаар тогтоох уу? Манайхаас бусад орон өндөржилтийн хязгаарлалттай байдаг.
Нийслэлийн Засаг дарга бөгөөд Улаанбаатар хотын захирагч Х.НЯМБААТАР: -Улаанбаатар хотыг 2040 он хүртэл хөгжүүлэх асуудлыг боловсруулах ажил нийслэл дээр дуусах шатандаа ороод явж байна. Барилгын бүсчлэл өндөржилтийг 20х40-өөр тодотгож байна. Энэ бүсэд ийм өндөржилттэй оффисын барилга, орон сууц барих асуудлыг нарийвчлалтай оруулж ирж байна.
Нийт барилгажих талбай 70х30 байсныг 60х40 болгон оруулж ирсэн. Энэ стандартыг хангаагүй барилгын ажлыг хийлгэхгүй, Улсын комисс хүлээн авахгүй. Их тойруу дотор 1500 өндөр барилга барих А даалгавар авсан. Энэ нягтаршил ихтэй барилгын зөвшөөрлийг өөр газар руу шилжүүлэх зохицуулалт хийнэ.
Барилга, хот байгуулалтын сайд Ц.ДАВААСҮРЭН: -Улаанбаатар хотыг 2040 он хүртэл хөгжүүлэх төлөвлөгөөнд нарийвчлан тусгана. Хотыг дэд төвүүдээр хөгжүүлнэ. Сургууль, цэцэрлэг дэд бүтцийг бүгдийг байлгах, аль болох тэндээ наад захын төрийн үйлчилгээгээ авах, ажлаа эрхлэх төлөвлөлт хийгээд явж байна. Баянхошуу, Сэлбэ дэд төвийн төлөвлөлт хийгээд дуусч байна.
Ажлын даалгавар бүх зүйлээ батлуулчихаад сургууль, цэцэрлэг барилгүй орхидог асуудлыг Барилгын тухай хуулиар зохицуулна. Намрын чуулганы хугацаанд Барилгын тухай хуулийн төслийг өргөн барина. Айлуудын тоогоор гражтай байх, тухайн байрны орчинд ус зайлуулах, усны нөөцлүүрийн савтай байх зэрэг зохицуулалт тусгаж байна.
Төвийн зургаан дүүргийн Засаг дарга нар 0.07 га, 0.04 га газар
олгохыг хориглож байна
Нийслэлийн Засаг дарга бөгөөд Улаанбаатар хотын захирагч Х.НЯМБААТАР: -Энэ хуулийн үзэл баримтлалын дагуу асуулт тавилаа. Гэр хорооллыг барилгажуулах, авто замын түгжрэлийг буруулах, хэт их нягтаршилттай их тойруу дотор барилга барихыг хязгаарлахаар хуулийн төсөл өргөн барьсан. Их тойруугийн 1100 га газар дээр Барилга, хот байгуулалтын яамнаас өгсөн зөвшөөрлөөр дахиад 1500 өндөр барилга барихаар байна.
Өмнөх төлөвлөлтийн алдааг дахин гаргахгүйн тулд шинээр барилгажих барилгуудыг Их тойруугаас гаргах, их дээд сургуулиудыг дэд төвүүд рүү шилжүүлэх зорилт дэвшүүлж байга. Газар олголтыг үндсэндээ зогсоож байна. Төвийн зургаан дүүргийн Засаг дарга нар 0.07 га, 0.04 га газар олгохыг хориглож байна.
Нийслэлийн Засаг дарга дараах тохиолдолд газар олгоно. Үүнд, төр хувийн хэвшлийн түншлэл, нөхөн олговор байдлаар газар олгоё, дуудлага худалдаагаар дэд төв дотроо газар олгох. Авто замын зогсоол ашиглалтын талаар таны хэлсний дагуу зохицуулалт орж ирж байна.
Зогсоол нэмээд түгжрэл шийдсэн туршлага байдаггүй юм билээ. Торгуулиа төлөөгүй жолооч нарыг хөдөлгөөнд оролцуулахгүй гэдэг зохицуулалт хуульд орж ирж байгаа. 15 сая төгрөгийн торгууль төлөөгүй нөхөр хөдөлгөөнд оролцоод, дүрэм зөрчөөд яваад байна.
Торгуулиа төлөөгүй жолооч нарыг хөдөлгөөнд орохыг хориглосноор түгжрэл 10 орчим хувиар буурна. Бүсчлэлээ үе шаттай тогтооно. Их тойруугаар тогтоох уу, Бага тойруугаар тогтоох уу гэдгээ НИТХ шийднэ. Төлбөртэй бүсийн төлбөрийг 1000 төгрөгөөр ч тогтоож болно. Уян хатан зохицуулна.
Дэлхий дээр шалгарсан арга төлбөртэй бүс байна.
Замын хөдөлгөөний түгжрэлийг бууруулах асуудлыг хэлэлцэж байна
НЭМЭЛТ:
УИХ-ын чуулганы нэгдсэн хуралдаан үргэлжилж байна. Өнөөдрийн ээлжит хуралдаанаар яг одоо нийслэл Улаанбаатар хотын замын хөдөлгөөний түгжрэлийг бууруулах, гэр хорооллыг орон сууцжуулах тухай хуулийн төсөл болон хамт өргөн мэдүүлсэн хуулийн төслүүдийн хэлэлцэх эсэхийг хэлэлцэж байна.
Хэлэлцэж буй асуудалтай холбогдуулан гишүүд асуулт асууж, хариулт авч байна.
Эрүүгийн хуульд нэмэлт, өөрчлөлт оруулах тухай хуулийн төслийг хэлэлцэнэ
УИХ-ын чуулганы Баасан гарагийн /2023.11.03/ нэгдсэн хуралдаан 10.00 цагаас эхэлнэ. Хуралдаанаар дараах асуудлуудыг хэлэлцэхээр төлөвлөжээ.
Үүнд,
- Нийслэл Улаанбаатар хотын замын хөдөлгөөний түгжрэлийг бууруулах, гэр хорооллыг орон сууцжуулах тухай хуулийн төсөлб олн хамт өргөн мэдүүлсэн хуулийн төслүүдийн хэлэлцэх эсэх,
- Эрүүгийн хуульд нэмэлт, өөрчлөлт оруулах тухай хуулийн төсөл болон хамт өргөн мэдүүлсэн хуулийн төсөл /Засгийн газар 2023.10.13-ны өдөр өргөн мэдүүлсэн, анхны хэлэлцүүлэг/
- “Хүүхдийн эрхийг хамгаалах, хангахтай холбоотой асуудлаар явуулсан Улсын Их Хурлын хяналтын сонсгол”-ын тайлан, сонсгол явуулсан талаарх санал дүгнэлт
- Монгол Улсын Ерөнхий сайдын мэдээлэл: Хөгжлийн бэрхшээлтэй хүний эрхийг хангах, хамгаалах оролцоог нэмэгдүүлэх чиглэлээр хэрэгжүүлж байгаа үйл ажиллагааны талаар багтжээ.
Х.ТҮШИГ
