“Нүүрсний хулгай”-н нотлох баримтыг шинжлэн судлах нээлттэй сонсгол өнөөдөр (2023.12.07) гурав дахь өдрөө үргэлжилж байна.
Сонсголоор “Эрдэнэс Тавантолгой” ХК-ийн үйл ажиллагаа, санхүүгийн ерөнхий мэдээллийг судалж байна. Шинжээчийн танилцуулснаар, “Ти Ти Жи Ви Си Өү” ХХК “Эрдэнэс Тавантолгой” ХК-иас зарласан тендер сонгон шалгаруулалтад 2012-2023 оны хугацаанд гурван удаа оролцож, гэрээ байгуулжээ. Тодруулбал,
- 2011 – Төсөвт өртөг байхгүй. Санхүүжилтийн дүн 64 тэрбум 372 сая,
- 2015 – 1 их наяд 419 тэрбум 511 сая,
- 2021 – 2 их наяд 229 тэрбум 281 сая,
Нийт 3 их наяд 700 тэрбум төгрөгийн санхүүжилт авсан байна.
I. 2011 ХИЙСЭН ГЭРЭЭНИЙ ЗӨРЧИЛ
2011 онд “Макмахон Лимитед”, ХБНГУ-ын “ББМ Оперта” хамтарсан аж ахуйн нэгж “Эрдэнэс Тавантолгой” ХК-тай “Тавантолгой ордын Цанхийн зүүн талбайд олборлолтын үйл ажиллагаа явуулах” таван жилийн хугацаатай гэрээ байгуулжээ. Гэтэл тус хамтарсан компани эл гэрээний эрх үүргээ 2012 оны гуравдугаар сарын 25-нд “Ти Ти Жи Ви Си Өү” ХХК-д шилжүүлсэн байна.
“Ти Ти Жи Ви Си Өү” ХХК гадаадын 100 хувийн хөрөнгө оруулалттайгаар 2012 оны хоёрдугаар сарын 15-нд үүсэн байгуулагджээ.
II. 2015 ХИЙСЭН ГЭРЭЭНИЙ ЗӨРЧИЛ
2015 оны есдүгээр сарын 29-нд тус компани 38 сарын хугацаатай нэмэлт өөрчлөлт оруулсан гэрээ байгуулжээ. Энэ нь 1 их наяд 419 тэрбум 511 сая төгрөгийн санхүүжилттэй. Хуулиар тус компанитай 50 сая төгрөгөөс дээш үнийн дүн бүхий нэмэлт гэрээ байгуулах боломжгүй байжээ.
Х.ТҮШИГ
