“Шинэ хоршоо” хөдөлгөөнөөс Ардчилсан намд шаардлага хүргүүлж, “Үндэсний мэдээллийн төв”-д өнөөдөр (2024.05.28) хэвлэлийн хурал хийлээ. Энэ үеэр Засгийн газрын Хэрэг эрхлэх газрын даргын зөвлөх Ү.Амарбат дараах тайлбарыг өгсөн юм.
Ү.Амарбат хэлэхдээ, “Шинэ хоршоо” хөдөлгөөн өнгөрсөн нэг сарын хугацаанд хэрэгжсэн. Энэ бол сүүлийн 34 жилийн хугацаанд өрнөсөн, малчид өөрсдийн асуудлаа өөрсдөө гар бие оролцон, хамтран шийдвэрлэх хамгийн том боломж юм.
“Шинэ хоршоо” хөдөлгөөн малчны хотонд малын мах үнэгүйддэг, хотод болохоор магнаг болдог тогтолцоог халж, ченжийн оролцоогүйгээр малчид өөрсдөө анхан шатны боловсруулалтаа хийх боломж олгож буй. Монгол Улсад байгаа хөрөнгө оруулалтын тэгш эрхийг бий болгох хөшүүрэг юм.
Энэ зун, намрын цагийг ашигтайгаар өнгөрөөж чадвал ирэх өвөл улстөрчид өвс барьж ирдэг байдлыг халж, өөрсдөө асуудлаа шийдэж чаддаг мал аж ахуйг бий болгоно гэж үзэж байна. Мөн энэхүү хөдөлгөөнийг амжилттай хэрэгжүүлж чадвал малын гаралтай түүхий эд үргэлж хямдхан байдаг цаг үеийг түүх болгон үлдээх зорилготой юм.
Харамсалтай нь, энэ хөдөлгөөнийг олон талаар харлуулах, няцаах ажлууд хийгдэх боллоо. Хөтөлбөрийн хүрээнд огт хамааралгүй зүйлсийг нийтэд түгээж байгаа тул дараах дөрвөн зүйлийг тодруулж хэлье.
-
“Шинэ хоршоо” хөдөлгөөний хүрээнд хэрэгжиж байгаа зээлүүд 100 хувь банкаар олгогдоно. Зээлийн эцсийн шийдвэрийг арилжааны банкууд шийдвэрлэнэ. Ямар нэг улс төрч, эрх мэдэлтний оролцоо байхгүй.
-
Ямар нэгэн байдлаар малын бэлчээрийн газрыг огт хөндөхгүй. Харин зудын хүндрэлтэй цаг үеэр малчид тэжээлийн үнийн асуудлыг хөндөж байсан. Тиймээс малчид сумандаа “Шинэ хоршоо” хөдөлгөөний хүрээнд 5 га хүртэлх газрыг тэжээл тарих зориулалтаар авах боломжтой.
Монголд гаднын хөрөнгө оруулагчид ирээд, хэдэн зуугаар нь газрыг хашиж ашиглаж болж байхад газар нутгийн эзэд нь тэжээлээ тарих тавхан га газрыг өгье гэхээр Ардчилсан намынхан дургүйцээд байгааг ойлгохгүй байна.
-
Өнгөрсөн хугацаанд Ардчилсан намын нэр бүхий улстөрчид малчдыг байнга доромжилж ирсэн. Тухайлбал, АН-ын Үндэсний бодлогын хорооны гишүүд “Малчид урт хугацааны хөрөнгө оруулалтын зээлийг удирдах чадваргүй” гэж хэлсэн. Бид үүнтэй санал нийлэхгүй байгаа юм. Энэ бол 600 мянга гаруй малчин өрхийг доромжилсон хэрэг.
Малчид урт хугацааны зээл аваад, зах зээлийн шинэ харилцаанд түргэн хугацаанд суралцаад амьжиргаагаа дээшлүүлэх бүрэн боломжтой. Ганц манай улс ч биш, дэлхийн олон орон хоршооллын зарчмаар мал аж ахуйгаа өөд нь татсан байдаг юм.
-
Мөнгө хэвлэж тараах гээд байна гэдэг шүүмжлэл гарсан. Тэд яаж ажилладаг тэр байдлаараа сэтгэж байгаа юм л даа. 2012-2016 онд хамгийн их мөнгө хэвлэгдэж тараагдсан цаг үе байсан. Хариуцлагатай хэлэхэд, “Шинэ хоршоо” хөдөлгөөний хүрээнд Монголбанк ямар ч шинэ мөнгө хэвлэж тараахгүй. Хөдөлгөөний хүрээнд гарч буй зээлүүд бол цэвэр арилжааны банкуудын төвлөрүүлсэн эх үүсвэр, хөрөнгө юм. Энэ хөрөнгийг зөвхөн нийслэлд биш, хөдөө орон нутагт эргэлдүүлэхээр төр засаг мөн бодлого тодорхойлон ажиллаж байна” гэлээ.
А.БАЯР
