Dobu.mn сайт энэ долоо хоногт (2024.06.10-14) нийтлэгдсэн онцлох ярилцлагуудаас тоймлон хүргэж байна.
“LOVERS”-ИЙН ҮҮСГЭН БАЙГУУЛАГЧ Э.БАЛЖИННЯМ:
-Анхны кино үдэшлэг хийж байхад дуу, техникийн асуудал гараад дуугүй кино үзүүлсэн. Гэсэн ч хүмүүс маш сэтгэгдэл өндөр буцаж байлаа. Тэгээд л тэр өдрөөс хойш өнөөдрийг хүртэл жил бүрийн тавдугаар сараас есдүгээр сар хүртэл хүмүүсийн мэдрэмжийг, дурсамжийг бүтээхээр ажиллаж байна.
Маш их уур бухимдалтай, стресстэй, яг юуны төлөө амьдраад байгаа нь ч хүртэл эргэлзээтэй болсон нийгэмд жаахан ч болов гэрэл нэмж, өөр өнцгөөс нь хараач, өөртөө амралт өгөөч, бие биеэ хайрлаач гэдэг агуулгыг хүргэх үүднээс “ой модон дундах кино театр” гэдэг үйл ажиллагааг хэрэгжүүлж байгаа юм.
Э.Балжинням: Азийн хамгийн том “Ойн цоорхойн кино театр” байгуулахыг хүсдэг
ПОЛИМЕР УРЛААЧ Б.БЯМБАДУЛАМ:
-Нэмэлт орлоготой болж, хоббигоо хөгжүүлэх зорилгоор полимер урлал сонирхож, бүтээл урлаж эхэлсэн. Миний хувьд мэргэжлээрээ ажиллаж амжилгүй хоёр хүүхдийн ээж болсон. Энэ үед дөнгөж төрсөн ээжүүдэд тохиолддог сэтгэл гутралд бага зэрэг орсон. Гэхдээ удалгүй гар урлал хийж эхэлснээр сэтгэлээр унах, стресстэх нь багассан.
Миний нөхөр намайг маш сайн дэмждэг. Аяга, шавар, ойр зуурын материал дуусахад авчраад өгдөг. Мөн хүргэлт хийж, заримдаа хүүхдүүдээ хардаг. Нөхөр маань дэмжиж, ойлгодог учраас урлал маань урлан болтлоо өргөжиж байна.
“Цалинтай ээж”-ийн 50 мянгаар эхлүүлсэн урлалаа УРЛАН болгохыг зорьж буй Б.Бямбадулам
СЭТГЭЛ ЗҮЙЧ Ж.ҮЙЛСТ:
-Хосууд болзохоо зогсоож болохгүй. Заримдаа амьдралын шаардлагаар хүүхдүүд ойрхон төрөх, хол байх зэрэг янз бүрийн нөхцөлөөс үүдээд уулзаж чадахгүй байх тохиолдлууд байдаг. Гэхдээ хүмүүс цалингаа буухаар болзоно, эсвэл төрсөн өдрөөр нь болзоно гэх мэтчилэн тодорхой нөхцөлүүдэд болзоог зохион байгуулаад байдаг.
Гэхдээ ихэнх амжилттай яваа хосуудыг харахад долоо хоногтоо заавал нэг удаа цаг гаргадаг. Хэчнээн завгүй байсан ч гэсэн сонсох, ярилцах цаг гаргадаг. Амьдралын чухал үйл ажиллагаануудыг алдахгүй байнга тэмдэглэх гэх мэт амьдралын тогтсон хуваарьт орчихсон байдаг. Тэр нь тогтмол явагдаж байгаа учраас эргээд хосын харилцаанд энэ хүний хувьд би чухал гээд эргээд хайрлагдсан, холбогдсон мэдрэмжийг авч чадна.
Сэтгэл зүйч Ж.Үйлст: Хосын харилцаагаа аврахын тулд тогтмол ЭВЕНТ зохион байгуулах хэрэгтэй
“ДИОНИС” ТЕАТРЫН НАЙРУУЛАГЧ Б.ТЭМҮҮЛЭН:
-Миний үеийн залуус яг хаягдчихсан юм шиг санагддаг. Нийгмийн тодорхой хэсэг академик бүтээлийг зохих газарт нь үзэж урлагийн мэдрэмжээ авдаг. Хүүхдүүд мөн адил нас, сэтгэхүйн онцлогтоо тохирсон бүтээлийг хүлээж авдаг. Гэтэл залуус яг дунд нь орхигдсон. Үнэхээр хэрэгцээнд нь тохирсон, сэтгэгдэл үлдээхүйц, цааш ахихад нь хэрэгтэй уран бүтээл маш ховор. Тийм ч учраас энэ чөлөөт театр, гудамжны театр, бага тайзны бүтээлийг хүргэхээр зорьсон.
Ямар нэгэн биеэ барих зүйлгүйгээр, уянгын халилгүй, уйлж дуулсан зүйлгүй, хэт сүржин биш энгийн байгаа амьдралыг харуулах үүднээс л энэхүү газарыг сонгосон. Сонголт маань ч өнөөдөр үзэгч залууст маш их таалагдаж байгаа.
Б.Тэмүүлэн: Бид маш том асуудлыг зүгээр л амьдралын нэг хэсэг мэт ойлгодог болчихож
Л.ЗУЛ
