Нийслэлийн Засаг дарга бөгөөд Улаанбаатар хотын захирагч Х.Нямбаатар Геодези, Усны барилга байгууламжийн газар (ГУББГ), нийслэлийн Хяналт шалгалтын газар, Хот байгуулалт, хотын стандартын газрын төлөөллийг оролцуулсан ажлын хэсэг байгуулж, барилгын компаниуд хөрсний усаа хэрхэн соруулж, шавхаж байгаа талаар хяналт шалгалт зохион байгуулж, зөрчлийг арилгуулах үүрэг өгсөн.
Энэ хүрээнд дээрх ажлын хэсгийн төлөөлөл өнөөдөр Хан-Уул дүүргийн 17 дугаар хороо, “Эко Констракшн” ХХК-ийн 3Маршал Таун3 төслийн талбайд ажиллалаа. Энэ үеэр “Эко констракшн” болон “Бондушка” ХХК хөрсний усаа борооны ус зайлуулах хоолой руу шахсаж байсан зөрчлийг арилгуулав.
ГУББГ-ын ХАБ-ын инженер Д.Ариунтуяа “Эко Констракшн ХХК-ийн хувьд манай байгууллагаас ямар ч зөвшөөрөл авалгүй борооны ус зайлуулах хоолой руу хөрсний усаа шахаж байна.
Манай байгууллагын зүгээс зөрчлийг арилгуулах албан шаардлагыг удаа дараа хүргүүлсэн ч өнөөдөр нөхцөл байдал хэвээр байна.
Дээрх борооны ус зайлуулах хоолой руу “Эко Констракшн” ХХК-аас гадна “Бондушка” ХХК мөн адил зөвшөөрөлгүйгээр хоолой холбож хөрсний ус шавхаж байна” гэв.
Эх сурвалж: НЗДТГ-ЫН ХЭВЛЭЛ МЭДЭЭЛЭЛ, ОЛОН НИЙТТЭЙ ХАРИЛЦАХ ХЭЛТЭС
