УИХ-ын чуулганы нэгдсэн хуралдаан (2023.06.16)-аар 2023 оны төсвийн тодотголыг эцэслэн баталсан билээ. Үүнтэй холбогдуулан цалин, тэтгэврийг хэрхэн нэмэх талаар Хөдөлмөр, нийгмийн хамгааллын сайд Х.Булгантуяа болон холбогдох албаныхан (2023.06.28) мэдээлэл хүргэж байна.
ХНХ-ын яамны Хөдөлмөрийн харилцааны бодлогын хэрэгжилтийг зохицуулах газрын дарга Б.Алимаа “Төрийн албан хаагчдын цалинг долдугаар сарын 1-нээс нэмэгдүүлэхээр төсвийн тодотголд 991 тэрбум төгрөг тусгагдсан. Улсын хэмжээнд 225 мянган хүн төрийн албанд ажиллаж байна. Үүнээс 217 мянга орчим төрийн албан хаагчийн цалин 26-50 орчим хувиар нэмэгдэнэ.
Төрийн нийтлэг үйлчилгээнд 52 мянган албан хаагч бий. Өнгөрсөн нэгдүгээр сарын 1-нээс энэ албан хаагчдын цалин найман хувиар нэмэгдсэн. Энэ долдугаар сарын 1-нээс дахин 26-31 орчим хувиар нэмэгдүүлэхээр тооцлоо.
Төрийн мэргэжлийн үйлчилгээ болох шинжлэх ухаан, эрүүл мэнд, боловсрол, соёл, биеийн тамир спортын салбарын үйлчилгээний албан хаагчдын цалин 40-50 орчим хувиар нэмэгдэхээр байна. Энэ салбарын албан хаагчдын доод цалин 590 мянган төгрөг байсан бол одоо нэг сая хүрнэ гэсэн үг.
Төрийн захиргааны албан хаагчдын цалинг мөн нэмэгдүүлэхээр тооцоолсон. Хамгийн доод цалин нь 717 мянган төгрөг байсан бол нэг сая төгрөгт хүргэхээр болж байна.
Төрийн тусгай албан хаагчдын тухайд хоёр төрлийн цалингийн сүлжээгээр олгож байсан. Үүнийг нэгтгэж, ижил зэрэглэлийн албан хаагчдын цалинг нэг сүлжээгээр цалинжуулахаар болсон. Энэ салбарын албан хаагчдын доод цалин 717 мянган төгрөг байсныг нэг саяд хүргэлээ.
Ирэх оноос төрийн албан хаагчдын цалинг инфляцтай уялдуулан нэмэгдүүлэхээр төлөвлөж байна” гэлээ.
Х.ТҮШИГ
