Гурав орчим км шороон замаар төөрч, будилж явсаар уулын энгэрт байрлах 20 айлын шинэ суурьшлын бүсэд очлоо. Урд буй айлынхан хашааны хаалгаа босгож, хойхно талд нь хоёр залуу нүх ухаж байв. Жорлон барихаар зэхэж буй нь энэ ажээ. Жаахан цаашилбал, хойноосоо хоёр дахь гэрийн гадаа хүүхдүүд шуугилдаж, 70 гаруй насны нэгэн өвөө хашааны шон босгохоор газар ухаж суулаа. Тэднийг бараадан очвол “Та биднийг хичээлдээ яваагүй байгаад гайхахгүй байна уу” гэсээр 3-10 орчим насны дөрвөн хүүхэд угтлаа.
Өнгөрсөн наймдугаар сарын 5-нд орсон аадар борооны улмаас Баянзүрх дүүргийн 21, 27 29 дүгээр хороо буюу Дарь-Эх, Монел орчмын 360 айл үерт автаж, үүнээс 47 нь орон гэргүй болсон билээ. Эдгээр айлуудад Нийслэлийн Засаг даргын тамгын газрын нөөц хөрөнгөөс таван ханатай, иж бүрэн тавилгатай гэр өгч, шинэ суурьшлын бүсэд газар олгохоор болсон. Үүнээс эхний 20 айлд нь наймдугаар сарын 11-нд Баянзүрх дүүргийн 21-р хорооны Богдын даваа орчимд гэр, газар олгосон юм.
Тухайн үед Нийслэлийн Засаг даргын Эдийн засаг, дэд бүтэц хариуцсан нэгдүгээр орлогч Ж.Сандагсүрэн “Шинэ суурьшлын бүсэд суурьших эхэндээ хэцүү. Замаас эхлээд хүндрэлтэй зүйлс байна. Тиймээс бид ирэх жилүүдийн хөрөнгө оруулалтад үер усны гамшгийг шийдвэрлэх асуудлыг тусгана.
Мөн нийтийн тээврийн үйлчилгээг зохицуулж таарна. Том автобус явахааргүй юм байна. Тэгэхээр дунд оврын автобусаар явуулах төлөвлөгөөтэй байна” гэж байсан юм.
Гэтэл одоог хүртэл нийтийн тээвэр явж эхлээгүй байна. Үүнээс болж хүүхдүүд хичээлдээ явж чадахгүйд хүрчээ.
ВИДЕО ХЭЛБЭРЭЭР ҮЗЭХ:
“УНАА ТЭРЭГ БАЙХГҮЙ БОЛОХООР АЧ НАРАА ХИЧЭЭЛД НЬ ЯВУУЛЖ ЧАДСАНГҮЙ”
Оршин суугч Т.Нацагдорж “Хөгшинтэйгөө, ач нартайгаа нийлээд, бид энд наймуулаа амьдардаг юм. Уржигдар цахилгаанаа залгуулсан. Одоо хашаа барих гээд шон босгож байна. Энд утасны сүлжээ, унаа тэрэг, ус байхгүй. Нааш, цааш явган явах хэцүү юм. Хоёр дахь, дөрөв дэх, хагас сайн өдөр зөөврийн ус ирнэ гэсэн. Гэтэл хагас сайны ус нь ирээгүй.
Унаа тэрэг байхгүй болохоор ач нараа сургууль, цэцэрлэгт нь явуулж чадаагүй. Уг нь гэр хүлээлгэж өгөхдөө жижиг оврын автобус явуулна гэж ярьж байсан. Одоогоор явж эхлээгүй л байна. Цөөхөн айл байдаг, зарим нь ирдэггүй болохоор автобус явуулахад төвөгтэй байдаг юм байлгүй дээ.
Анх гэр өгөхөд нь баярлаж, ярилцлага өгөөд л талархсанаа илэрхийлж байсан. Дараа нь болж, бүтэхгүй асуудал гарах үед нь шүүмжилтэл намайг хүмүүс шуналтайгаар маань дуудаад байна.
Одоохондоо дулаахан сайхан л байна. Өвөл цас орвол амьдрах аргагүй л юм байна. Буцаад хашаа руугаа нүүдэг ч юм билүү гэж бодож байна. Унаа, сүлжээ байхгүй энэ газар өвчин тусвал яах юм бэ. Замаа жаахан засаад, автобус явуулчихвал л болчих гээд байна” гэлээ.
“УТАСНЫ СҮЛЖЭЭ, ХОГ, ЗАМЫН АСУУДЛЫГ ШИЙДЭЭД ӨГӨӨСЭЙ”
Оршин суугч (нэрээ нууцлахыг хүсэв) “Манайх ам бүл гурвуулаа. Цэцэрлэгийн насны нэг хүүхэдтэй. Машинтай болохоор хүүгээ цэцэрлэгт нь өгчихсөн. Болоод л байна. Унаагүй хүмүүст нь л их хэцүү байх шиг байна. Үерийн аманд байсан учир энэ шинэ суурьшлын бүсэд байхаас өөр аргагүй.
Та бүхэн ирэхдээ харсан байх. Зам нь хэцүү юм билээ. Хөдөөнөөс төв рүү орж байгаа юм шиг л амьдарч байна. Ойр зуурын хүнс авахаар дэлгүүр орохдоо хүртэл гурав, дөрвөн км шороон зам туулж очно.
Мөн сүлжээний асуудал хэцүү байна. Юнителийн сүлжээ байхгүй. Мобикомыг бол утсаа унинд хавчуулж байж нэг зураас оруулдаг. Бас хогоо яах учраа олохгүй байна. Хогийн машин гаргах эсэх нь тодорхойгүй” гэсэн юм.
ХОЁР АЙЛ ГЭРЭЭ АВААД НҮҮЖЭЭ
20 айлын хоёр нь гэрээ аваад нүүжээ. Мөн ойр орчмын айлуудын хэлж буйгаар хоёр өдрийн өмнө нэг айл гэрээ үлдээгээд, тавилгаа ачаад явсан аж. Биднийг очих үед есөн айлын хаалга түгжээтэй, дөрвөн айл хашаагаа босгочихсон байсан юм.
Хаалга нь түгжээтэй айлуудын талаар сураглавал амралтын хоёр өдөр ирээд, ажлын өдрүүдээр байдаггүй аж. Энэ нь унаа тэрэг байхгүйтэй холбоотой юм байна. Тиймээс нэн тэргүүнд нийтийн тээврээр үйлчилдэг болох хэрэгтэй байна.
Х.ТҮШИГ
