Хүнс, хөдөө аж ахуйн сайд асан Т.Бадамжунай нарт холбогдох хэргийг шүүх хуралдааны урьдчилсан хэлэлцүүлэг өнөөдөр /2023.10.25/ 10.00 цагт Баянзүрх, Сүхбаатар, Чингэлтэй дүүргийн эрүүгийн хэргийн Анхан шатны шүүхэд эхэлсэн. Шүүх хуралдаанд шүүгдэгч Э.Жаргалсайхан, Д.Баярсайхан, Д.Бямба-Очир нар ирсэн ч Т.Бадамжунай ирээгүй юм. Учир нь тэрбээр өнгөрөгч есдүгээр сарын 25-нд цус харвасан гэх оноштойгоор Улсын хоёрдугаар төв эмнэлэгт хүргэгдэн, хэвтэн эмчлүүлж эхэлсэн. Түүнээс хойш биеийн байдал нь сайжраагүй, хүнд хэвээр байгаа аж.
Т.Бадамжунай өнөөдрийн хэлэлцүүлэгт ирээгүй ч шүүх хуралдаанд өөрийн биеэр оролцох хүсэлтэй байгаагаа илэрхийлжээ. Тиймээс түүний эл хүсэлтийг шүүх бүрэлдэхүүн хүлээн авч, ирэх арваннэгдүгээр сарын 3-ныг хүртэл урьдчилсан хэлэлцүүлгийн шүүх хурлыг хойшлууллаа.
Эрүүгийн хэрэг хянан шийдвэрлэх тухай хуульд зааснаар хэрэг шүүхэд шилжсэнээс хойш 45 хоногийн дотор шүүх хуралдааны урьдчилсан хэлэлцүүлгийг хийх ёстой байдаг. Арваннэгдүгээр сарын 3-ны өдөр Т.Бадамжунай нарт холбогдох хэргийн шүүхийн урьдчилсан хэлэлцүүлгийг хийх эцсийн хугацаа юм. Өөрөөр хэлбэл, арваннэгдүгээр сарын 3-нд Т.Бадамжунайн биеийн байдал ямар байхаас үл шалтгаалж, урьдчилсан хэлэлцүүлэг болно гэсэн үг.
Т.Бадамжунайн талаар түүний өмгөөлөгч Н.Цэцэгмаагаас тодруулахад, үйлчлүүлэгчийнхээ гэм буруутай эсэхийг өнөөдөр ярих боломжгүйг тодотгоод, дараах мэдээллийг өглөө.
Тэрбээр “Хэрэг шүүхэд шилжсэнээс хойш 45 хоногийн дотор урьдчилсан хэлэлцүүлгийг хийх хуультай учир шүүх хурлыг арваннэгдүгээр сарын 3-ныг хүртэл хойшлуулсан гэж харж байна. Т.Бадамжунайн эрүүл мэндийн талаар урьдчилсан хэлэлцүүлгийн үеэр дэлгэрэнгүй ярьсан. Үүнээс илүүгээр би хувь үйлчлүүлэгчийнхээ эрүүл мэндийн байдлын талаар хэвлэл мэдээллийн хэрэгслээр ярих боломжгүй. Ямартай ч миний үйлчлүүлэгч шүүх хуралдаа өөрийн биеэр оролцох хүсэлтэй байна. Гэхдээ арваннэгдүгээр сарын 3-ныг хүртэл биеийн байдал нь хэрхэхийг мэдэхгүй” гэсэн юм.
Шүүх хурлын үеэр өмгөөлөгч Н.Цэцэгмаа “Миний үйлчлүүлэгч 2023 оны есдүгээр сарын 25-ны өглөө харвасан байдалтай байсан. Гуравдугаар эмнэлэгт очиход оношийг нь тогтоож чадахгүй байсан. Улмаар Хоёрдугаар төв эмнэлэг гэх мэтээр дамжиж явсаар оношлуулсан. Эмч нар түүнийг харвасан болохыг тогтоосон. Үүний улмаас Т.Бадамжунайн зүүн талын гар, хөл болон хэл яриа саажилттай, артерийн даралт ихсэх өвчний нэгдүгээр (зарим эмнэлэг хоёрдугаар шат гэж оношилсон) шаттай байна.
Есдүгээр сарын 25-наас аравдугаар сарын 5-ны хооронд Хоёрдугаар эмнэлэгт, аравдугаар сарын 13-наас 19-ний хооронд “Аллерги мед” эмнэлэгт тус тус хэвтэж эмчлүүлсэн. Гэвч засралыг олоогүй. Тиймээс энэ сарын 23-ны өдрөөс эхлэн УНТЭ-ийн мэдрэлийн тасагт хэвтэн эмчлүүлж байна. Одоогоор түүний биеийн байдал тааруу, бусдад өөрийгөө илэрхийлэх чадваргүй байгаа учраас өнөөдрийн байдлаар шүүх хуралдаанд ирэх боломжгүй байна. Өөрийнх нь туйлын хүсэл бол урьдчилсан хэлэлцүүлэг болон шүүх хуралдаанд биечлэн оролцох” гэсэн юм.
Сануулахад, “Шувуу” ажиллагааны хүрээнд дөрөвдүгээр сарын 5-нд Филиппин улсаас баривчлан, Монгол Улсад авчран саатуулсан Хүнс, хөдөө аж ахуйн сайд асан Т.Бадамжунайг Авлигатай тэмцэх газар (АТГ)-аас хэд хэдэн хэрэгт яллагдагчаар татан шалгаж дуусаад, шүүхэд шилжүүлэх саналтайгаар хэргийг нь прокурорт хүргүүлсэн.
Нийслэлийн прокурорын газраас албан үүрэг, бүрэн эрх, албан тушаалын нэр хүнд, эрх нөлөөг урвуулан ашиглаж, хууль бусаар газар эзэмшсэн, бусдад хахууль өгөхийг завдсан, нэр бүхий аж ахуйн нэгж байгууллагад давуу байдал бий болгосон, мөнгө угаасан гэх хэрэгт Эрүүгийн хуулийн 22.5 дугаар зүйлийн 1 /Хахууль өгөх/, 22.1 дүгээр зүйлийн 1 /Эрх мэдэл, албан тушаалын байдлаа урвуулан ашиглах/, 18.6 дугаар зүйлийн 2.2 /Мөнгө угаах/, 2002 оны Эрүүгийн хуулийн 263 дугаар зүйлийн 263.2 /Төрийн албан тушаалтан албаны эрх мэдэл буюу албан тушаалын байдлаа урвуулах/-т зааснаар яллах дүгнэлт үйлдэн, Сүхбаатар дүүргийн эрүүгийн хэргийн анхан шатны шүүхэд шилжүүлсэн байдаг.
Т.БАДАМЖУНАЙН ӨМГӨӨЛӨГЧ Н.ЦЭЦЭГМААГААС АВСАН ТОДРУУЛГЫН ВИДЕО
УРЬДЧИЛСАН ХЭЛЭЛЦҮҮЛГИЙН ШУУД ДАМЖУУЛАЛТ:
Л.ЗУЛ
Х.ТҮШИГ
[…] бид нөхцөл байдлыг тодруулсан. Тодруулгыг ЭНД дарж уншина […]