ӨЛГӨЦ: Цэцэрлэгийн хүүхдийн нэг өдрийн хоол жин хасах дэглэмээс ч “хатуу” байна

Цахим орчинд нэгэн иргэн хүүхдийнхээ цэцэрлэгийн нэг өдрийн хоолны зургийг оруулжээ. Зурагт харуулснаар,

• • Өглөөний цайнд нэг аяга сүүтэй будаа, цай,
  • Үдийн цайнд нэг аяга тараг,
  • Өдрийн хоолонд нэг аяга бантан, нэг ширхэг мантуун бууз,
  • Оройн хоолонд нэг аяга цай, нэг ширхэг боов өгдөг ажээ. 

Хоолны зардлын нормативыг тогтоох тухай Засгийн газрын тогтоолд “Цэцэрлэгийн хүүхэд бүрийн нэг өдрийн хоолны зардлыг 8-10 цагаар ажилладаг цэцэрлэгт 2475 төгрөгөөр, 24 цагаар ажилладаг сувиллын болон тусгай цэцэрлэгийн хүүхэд бүрийн нэг өдрийн хоолны зардлыг 3600 төгрөгөөр тус тус тогтоосугай” хэмээн заасан байдаг. Уг тогтоолын дагуу цэцэрлэгүүд нэг хүүхдэд өдөрт 2475 төгрөгийн хоол өгч байна. 

Иймд цэцэрлэгийн хүүхдийн хоолны зардлыг нэмэх шаардлагатай байгааг эцэг, эхчүүд хэлсээр буй. Тэд “Хүүхдүүд орой гэртээ өлсөж ирдэг. Цэцэрлэгийн нэг өдрийн хоол жин хасах дэглэмээс ч хатуу байна” хэмээн шүүмжилж байна. 

Сануулахад, Боловсрол, шинжлэх ухааны сайд Л.Энх-Амгалан дээрх асуудалтай холбогдуулан “Цэцэрлэгийн хүүхдийн үдийн хоолны зардал 2470 төгрөг байна. Хүүхэд өдөрт авах ёстой шим тэжээлийнхээ 80 хувийг цэцэрлэгээр дамжиж авч байна. Тиймээс үүнийг хамгийн багадаа 4000 төгрөг болгох шаардлагатай.

Цэцэрлэг, сургуулийн хүүхдүүдийн үдийн хоолны зардал 170 орчим тэрбум төгрөг болдог. Тогооч нарын цалин зэрэг бусад зардалтай нийлээд 230 тэрбум төгрөг улсын төсөвт сууж байна. Үдийн хоолны зардлыг хоёр дахин нэмбэл төсөв нь мөн л хоёр дахин нэмэгдэнэ. Тиймээс мөнгөний эх үүсвэр хэрэгтэй.

Миний бодлоор, хүүхдийн 100 мянган төгрөгийн 50 мянгыг үдийн хоолонд нь зарах шийдэл гаргавал 1-12 дугаар ангийнхаа бүх хүүхдэд хоол өгөх бололцоо байна. Ийм аргаар асуудлыг шийдэхгүй бол дан ганц төсөвт ачаалал үүрүүлэх нь эрсдэлтэй” хэмээн байр сууриа илэрхийлсэн билээ. 

Х.ТҮШИГ