Гаалийн байгууллагын ажилтнууд Монгол Улсын эмийн бүртгэлд бүртгэлгүй, тарифын бус хязгаарлалт тогтоосон эм, тариа хууль бусаар нэвтрүүлэхийг завдсан зөрчлийг илрүүлжээ.
Тодруулбал “Чингис хаан” олон улсын нисэх буудал дахь гаалийн газрын Нисэх буудлын гаалийн хяналтын бүсэд зорчигчийн гар тээшинд Гаалийн байгууллагад мэдүүлээгүй, Монгол Улсын эмийн бүртгэлд бүртгэлгүй, 12.75 кг тарифын бус хязгаарлалт тогтоосон эм, тариаг хууль бусаар нэвтрүүлэхийг завдсан зөрчилд шалган шийдвэрлэх ажиллагаа явуулж байгаа аж
Тухайн зорчигч 2024 оны гуравдугаар сарын 29-ний 05:07 цагт буусан ОМ162 аяллын дугаартай Истанбул-Улаанбаатар чиглэлийн онгоцоор иржээ.
Эрүүгийн хуулийн 20 дугаар зүйлийн 20.14.1-д “Эм, эмийн түүхий эд, био бэлдмэл, эмийн хэрэгслийн хангамжийн үйл ажиллагаа эрхэлж байгаа хүн, малын эмчилгээнд хэрэглэхийг хориглосон, зөвшөөрөгдөөгүй, хугацаа дууссан эм, эмийн түүхий эд, биобэлдмэл, эмнэлгийн хэрэгслийг үйлдвэрлэсэн, импортолсон, худалдсан, түгээсэн бол хоёр мянга долоон зуун нэгжээс арван дөрвөн мянган нэгжтэй тэнцэх хэмжээний төгрөгөөр торгох, эсхүл зургаан сараас гурван жил хүртэл хугацаагаар зорчих эрхийг хязгаарлах, эсхүл зургаан сараас гурван жил хугацаагаар хорих ял шийтгэнэ” гэж заасан байдаг.
Э.ЭГШИГЛЭН
