Дэлхийн номын өдөр өнөөдөр тохиож байна. НҮБ-ын Боловсрол, шинжлэх ухаан, соёлын байгууллага (ЮНЕСКО)-аас 1995 онд 4 дүгээр сарын 23-ныг “Дэлхийн номын өдөр” болгон зарласан билээ. Энэ өдөр дэлхийн 100 гаруй оронд зохиолч, хэвлэн нийтлэгчдэд хүндэтгэл үзүүлэх, ном уншихын ач холбогдлыг олон нийтэд сурталчлан таниулдаг билээ.
Энэхүү өдрөөр танд дараах номуудыг санал болгож байна. Бүрхэг өдөр, аяга кофе, зөөлөн хөгжим мөн эдгээр ном танд хань болж чадна байх.
“Номын утга нь тэнгэр мэт агуу, дэлхий мэт өргөн, далай мэт гүн. Номыг унших нь тэнгэрт нисэж, дэлхий тойрч, далайд хөвөх мэт.
Ц.Дамдинсүрэн
-
Стивин Кинг “Бичихүйн тухай”
Бүх цаг үеийн шилдэг борлуулалттай зохиолчдын нэг гэгддэг Стивен Кингийн “Бичихүйн тухай” хэвлэгдэхэд Entertainment Weekly сэтгүүл “Хаантны (Кинг) өлмий бат оршиг” хэмээн нийтэлж байв. 1973 оны хавар Doubleday хэвлэлийн газар “Кэрри” романыг нь хэвлэснээр Кингийн нэр уран зохиолын ертөнцөд цуурайлах болов. Тэр цагаас хойш “Ногоон бүс”, “Гялбаа”, “Үхлийн бүс” зэрэг 70 гаруй роман, 5 уран зохиолын бус ном, 200 гаруй өгүүллэг, тууж бичсэнээс 60 гаруй ном хэвлэсэн нь борлуулалтаараа дэлхийд тэргүүлсээр байна.
Энэхүү номыг Тагтаа хэвлэлийн газрын үүсгэн байгуулагч Батсуурийн Баясгалан орчуулж, уран сайхны редактороор Мөнхцолын Батбаяр ажиллажээ. Мөн хавтасны зураачаар Лхаасүрэнгийн Нямдорж ажиллажээ.
“БИЧИХҮЙН ТУХАЙ” номоос…Бурхан хангалттай авьяас өгчхөөд байхад бурхны нэрийг бодож түүнийгээ жаахан ч болов ашиглаж болно оо доо. Яагаад тэгдэггүй юм бол?Миний цагийн хуваарь ч яс тас. Өглөөдөө ямар нэг шинэ зохиол дээр ажиллана. Үдийг дугхийх, захиа занаа бичихэд зориулна.
2. Шидэт реализмын “эцэг” гэгддэг “100 жилийн ганцаардал” роман
Дэлхийн олон оронд бестселлер болсон Г.Г.Маркесийн хамгийн алдартай бүтээл, чухам түүний нөлөөгөөр Латин америкийн уран зохиолыг дэлхийд дэлгэрсэн гэж хэлэхэд хилсдэхгүй. Маркес уг бүтээлээрээ Нобелийн шагнал хүртсэн бөгөөд 2002 онд Норвегийн Номын клуб “Зуун жилийн ганцаардал” романыг “Дэлхийн шилдэг 100 зохиол”-ын нэгээр нэрлэжээ.
3. “Фаренхайтын 451 хэм” Орчуулагч Д.Дашмөнх
Энэ бол хаа нэгтээ, ирээдүйд “ном хүмүүст хэрэггүй” гэж үзэх болсон тэр цаг үеийн тухай түүх юм. Нэгэн цагт гал сөнөөгч байсан хүмүүс Ном шатаах тусгай албанд ажиллах болжээ. Тэрхүү галын албанд ажилладаг Гай Монтэг гэгч залуу яагаад ном шатаагаад байгаагаа ойлгохыг хүснэ.
Ном унших учир шалтгаан байна уу? хэмээн тэр эргэлзэх болов. Хүн энэ хорвоод жаргах гэж ирсэн байтал үй олон санаа бодол, зовлон бэрхшээл, уй гунигийн мэдрэмж төрүүлдэг ном хүнд чухам ямар хэрэгтэй юм бэ?
4. Ричард Бах “Жонатан Ливингстон хэмээх цахлай”
Жонатан Ливингстон хэмээх цахлай бүтээл нь 1970 онд анх нийтлэгдсэнээсээ хойш өнөөдрийг хүртэл дэлхий даяар гучаад хэл рүү орчуулагдаж, ойролцоогоор тавин сая хувь борлуулагдсан, дэлхийн сонгодог бүтээлүүдийн нэг болоод амжжээ. Эл номыг уншсан хүмүүс ‘цахлай’ гэдэг үгийг Жонатаны тухай бодохгүйгээр бараг л төсөөлөхийн аргагүй болсон шиг. Тэгэхээр энэ цахлай юугаараа бусдаас онцлог юм бол, бас энэхүү бүтээлийн мөхөшгүй мөнхийн чанар юундаа байна вэ?
5. Мүраками Харүки “Нэгдүгээр биеийн ганц тоо”
Дэлхийд хамгийн их нэрд гарсан Япон зохиолч Мүраками Харүки. 1987 онд хэвлэгдсэн Норвегийн ой роман нь Мүракамийг алдар хүндийн оргилд хөтөлсөн бөгөөд олон сая хувь борлогдож, түүнийг дэлхийд танигдсан зохиолч болох замыг нь нээж өгчээ. Мөн тэрээр Бүж, бүж, бүж, 1Q84 цуврал роман, Гүйлтийн тухай ярихдаа би юу хэлэв зэрэг олон ном бичиж хэвлүүлсэн нь уншигчдын сэтгэлийг татсаар байна.
Харилцан адилгүй цаг хугацаанд амьдралынх нь нэгээхэн хэсэгт тохиосон (үгүй ч байж болох) үйл явдлыг өгүүлэгч хүүрнэхдээ нууцлаг өвөрмөц дүрүүд болон дуу хөгжим, спорт зэрэгтэй уялдуулан дүрсэлсэн нь уншигчдад нарийн нандин мэдрэмж төрүүлэх биз ээ.
Нэгдүгээр биеийн өгүүлэмжээр хүүрнэх өгүүллэгүүдээс зөвхөн “Якулт хараацай багийн тухай шүлгийн түүвэр”-т л зохиолч өөрийн нэрийг дурдсан байдаг. Тиймээс энэ нь зохиолчийн жинхэнэ намтар дурсамж уу, уран зохиол уу гэдэгт хэн нэгэн нь эргэлзэж ч магад. Зарим уншигч эдгээр өгүүллэг нь ганц өгүүлэгчтэй гэж таамагласан бол зарим нь жазз хөгжим, бейсболд дуртай ахимаг настай эрэгтэй өгүүлэгч бол зохиолч өөрөө гэж үзсэн нь бий. Зохиолчийн өгүүллэгийн түүвэр уншигч танд мөн л асуулт үлдээж, нэгийг бодож, хоёрыг эргэцүүлэхэд хүргэх биз ээ. Танд өгүүллэг аль өнцгөөс хүрч, ямар бодолд автуулахыг таашгүй.
